मंगरूळपीर : नगरपरिषद निवडणुकीच्या प्रचाराचा जोर वाढत असताना वंचित बहुजन आघाडीचे युवा नेते सुजात आंबेडकर यांच्या उपस्थितीत मंगरूळपीर (जि. वाशिम) येथे भव्य प्रचार सभा पार पडली. सभेला नागरिकांची मोठ्या संख्येने गर्दी झाली होती.
सभेत बोलताना सुजात आंबेडकर यांनी स्थानिक प्रश्नांवर भर देत वंचितांच्या हक्कांसाठी पक्षाची भूमिका स्पष्ट केली. “वंचित बहुजन आघाडी ही वंचितांच्या अन्यायाविरोधातील पहिली भिंत आहे. कोणतीही परिस्थिती असो, अन्याय झाल्यास सर्वप्रथम उभे राहणारा लढाऊ पक्ष म्हणजे वंचित बहुजन आघाडी,” असे ते म्हणाले.
नगरातील विविध समस्यांच्या निराकरणासाठी वंचित बहुजन आघाडी कटिबद्ध असून निवडणुकीत पक्षाच्या उमेदवारांना विजय मिळवून देण्याचे आवाहन सुजात आंबेडकर यांनी उपस्थित नागरिकांना केले. “लढणाऱ्या कार्यकर्त्यांना मतदान करुन विजयी करायचे आहे.
वंचित बहुजन आघाडीचा नगराध्यक्ष आणि नगरसेवक निवडून आणा,” असे त्यांनी आवर्जून सांगितले. या सभेला वंचित बहुजन आघाडीचे पदाधिकारी, स्थानिक कार्यकर्ते आणि समर्थक मोठ्या संख्येने उपस्थित होते.
