वाशिम : वाशिम नगरपरिषद निवडणुकीच्या पार्श्वभूमीवर वंचित बहुजन आघाडीच्या उमेदवारांच्या प्रचारार्थ युवा नेते सुजात आंबेडकर यांची जाहीर सभा उत्साहात पार पडली. या सभेला नागरिकांची मोठी उपस्थिती पाहायला मिळाली.
यावेळी बोलताना सुजात आंबेडकर यांनी वाशिम शहरातील मुख्य समस्या अधोरेखित केल्या. त्यांनी म्हटले की, “वाशिममध्ये रस्ते व नाले यांची दुरवस्था असून नागरिकांना मूलभूत सुविधा मिळत नाहीत. तसेच शहरात खासगी रुग्णालये असली तरी गोरगरिबांना योग्य उपचारांसाठी बाहेर जावे लागते.”
या परिस्थितीला पूर्णविराम देण्यासाठी वंचित बहुजन आघाडीची सत्ता गरजेची असल्याचे ते म्हणाले. आघाडी सत्तेत आली तर 150 बेडचे सरकारी मल्टी स्पेशॅलिटी हॉस्पिटल उभारण्याचे आश्वासन त्यांनी यावेळी दिले.
वाशिमचा सर्वांगीण विकास आणि शहरातील समस्या सोडवण्यासाठी वंचित बहुजन आघाडीच्या उमेदवारांना निवडून देण्याचे आवाहन या सभेत करण्यात आले.
या कार्यक्रमाला वंचित बहुजन आघाडीचे उमेदवार, पदाधिकारी आणि कार्यकर्ते मोठ्या संख्येने उपस्थित होते.
