लोणावळा : वंचित बहुजन आघाडीच्या नवनिर्वाचित प्रदेश कार्यकारिणीची बैठक लोणावळा येथे ॲड. बाळासाहेब आंबेडकर यांच्या प्रमुख उपस्थितीत संपन्न झाली. लोकशाही पद्धतीने बॅलेट पेपरवर मतदान घेऊन कार्यकर्ते व सदस्यांनी निवडून दिलेल्या प्रदेश कार्यकारिणीच्या पुढील संघटनात्मक वाटचालीसंदर्भात या बैठकीत चर्चा करण्यात आली.
वंचित बहुजन आघाडीच्या प्रदेशाध्यक्षपदी राजेंद्र पातोडे यांची निवड झाली असून, नवनिर्वाचित प्रदेश कार्यकारिणीत सुजात आंबेडकर, अरुण जाधव, इंजि. प्रशांत इंगोले, जितरत्न पटाईत, डॉ. चित्रा कुऱ्हे, दिपक डोके, नागोराव पांचाळ, सर्वजित बनसोडे, कृष्णा देशमुख, सारंग थोरात, ज्ञानेश्वर कवठेकर आणि उत्तम वनशिव यांचा समावेश आहे.
लोकशाही मार्गाने बॅलेट पेपरवर झालेल्या मतदानातून कार्यकर्ते व सदस्यांनी या प्रदेश कार्यकारिणीची निवड केली आहे. त्यामुळे नवनिर्वाचित कार्यकारिणीसमोर पक्षाची संघटनात्मक ताकद वाढविणे, तळागाळातील कार्यकर्त्यांशी संपर्क अधिक मजबूत करणे आणि आगामी काळात पक्षाची भूमिका जनतेपर्यंत प्रभावीपणे पोहोचविण्याची जबाबदारी असणार आहे.
बैठकीनिमित्त नवनिर्वाचित प्रदेशाध्यक्ष राजेंद्र पातोडे यांच्यासह संपूर्ण प्रदेश कार्यकारिणीचे अभिनंदन करण्यात आले. तसेच वंचित बहुजन आघाडीच्या पुढील संघटनात्मक वाटचालीसाठी नवनिर्वाचित पदाधिकाऱ्यांना शुभेच्छा देण्यात आल्या.
