मुंबई : वंचित बहुजन आघाडी, मुंबई प्रदेश यांच्या वतीने दादर येथील यशवंत नाट्यगृह, माटुंगा येथे ‘जलसा वंचित बहुजनांचा – २०२६’ सोहळा अत्यंत उत्साहात पार पडला. या दिमाखदार सोहळ्यात सामाजिक, राजकीय, पत्रकारिता, वैद्यकीय, शैक्षणिक, तंत्रज्ञान, कला, सांस्कृतिक आणि फोटोग्राफी अशा विविध क्षेत्रांमध्ये उल्लेखनीय व मोलाचे योगदान देणाऱ्या मान्यवरांना ‘VBA सन्मान पुरस्कार – २०२६’ प्रदान करून गौरवण्यात आले.
या विशेष कार्यक्रमाला वंचित बहुजन आघाडीचे युवा नेते सुजात आंबेडकर यांची प्रमुख उपस्थिती होती. मान्यवरांना पुरस्कार प्रदान केल्यानंतर उपस्थितांना मार्गदर्शन करताना ते म्हणाले की, डॉ. बाबासाहेब आंबेडकरांनी आपल्या खांद्यावर सोपवलेली चळवळ आपण सर्वांनी पुढे नेत आहोत. बाबासाहेबांनी जो गाडा पुढे नेण्याची जबाबदारी आपल्यावर सोपवली, तो गाडा पूर्ण ताकदीने पुढे ओढण्याचे काम आपल्याला एकत्रितपणे करायचे आहे. (Vanchit Bahujan Aghadi Awards)
आपण केवळ राजकीय क्षेत्रातच नाही, तर प्रत्येक क्षेत्रात यश कमावले आहे, असे नमूद करत सुजात आंबेडकर पुढे म्हणाले की, ज्या-ज्या क्षेत्रांमध्ये आपल्याला आजपर्यंत जाण्याची संधी किंवा परवानगी नाकारली गेली, त्या सर्व क्षेत्रांमध्ये आज जाऊन स्वतःचे नाव मोठे करणे, आपल्या कर्तृत्वाचा ठसा उमटवणे आणि स्वतःची स्वतंत्र ओळख निर्माण करणे, हेदेखील आंबेडकरी विचारांचेच कार्य आहे.
आपापल्या क्षेत्रात उत्कृष्ट कार्य करत आंबेडकरवादी विचार पुढे नेणे, ही आजच्या काळातील एक मोठी लढाई आणि संघर्ष आहे, असे मत त्यांनी व्यक्त केले. (Jalasa Vanchit Bahujan 2026)
या सोहळ्यात खालील मान्यवरांना ‘VBA सन्मान पुरस्कार – २०२६’ देऊन सन्मानित करण्यात आले:
१. मिलिंद धुमाळे (संपादक, जागल्या भारत, मुंबई) – पत्रकारिता क्षेत्र
२. उमाताई जाधव (सामाजिक कार्य, जामखेड, अहमदनगर) – सामाजिक क्षेत्र
३. जोया लोबो (फोटोग्राफर, मुंबई) – फोटोग्राफी क्षेत्र
४. राजू केंद्रे (शैक्षणिक क्षेत्र, नागपूर) – शैक्षणिक क्षेत्र
५. दंगलकार नितीन चंदनशिवे (कवी, साहित्य, सांगली) – साहित्य व कला क्षेत्र
६. गौरव सोमवंशी (तंत्रज्ञान, उद्योजकता, औरंगाबाद) – तंत्रज्ञान व उद्योग क्षेत्र
७. गौरव मोरे (अभिनेता, मुंबई) – कला व चित्रपट क्षेत्र
८. प्रकाश भोईर (सामाजिक कार्यकर्ते, मुंबई) – सामाजिक क्षेत्र
९. साजन बेंद्रे (गायक) – कला व संगीत क्षेत्र
१०. सरिता कदम (पॉवर लिफ्टर खेळाडू) – क्रीडा क्षेत्र
११. सुमेध जाधव (पँथर, विविध दलित चळवळीत सक्रिय, वंचित बहुजन आघाडीचे खंदे समर्थक) – सामाजिक व राजकीय क्षेत्र
