शिरड शहापूर : वंचित बहुजन आघाडीचे हिंगोली जिल्हाध्यक्ष तथा जिल्हा समन्वयक अनिल कांबळे यांच्या नेतृत्वाखाली करण्यात आलेल्या रास्ता रोको आंदोलनाला मोठे यश मिळाले आहे. आंदोलनाची दखल घेत HP गॅस एजन्सी, हिंगोली यांनी शिरड शहापूर येथील ग्राहकांना नियमित सेवा देण्याचा निर्णय घेतला असून, आता दर बुधवारी गॅस गाडी गावात येणार असल्याचे जाहीर करण्यात आले आहे.
मागील अनेक महिन्यांपासून शिरड शहापूर व परिसरात HP गॅसचा पुरवठा अनियमित होत असल्याने नागरिकांना मोठ्या अडचणींचा सामना करावा लागत होता. वारंवार पाठपुरावा करूनही प्रश्न मार्गी लागत नसल्याने वंचित बहुजन आघाडीच्या वतीने अनिल कांबळे यांच्या नेतृत्वाखाली रास्ता रोको आंदोलन छेडण्यात आले होते.
Also Read : उमरखेडच्या विश्वजीत धुळेची भारतीय सैन्यात निवड; वंचित बहुजन आघाडीकडून सन्मान!
या आंदोलनाला गावकरी, महिला, युवक तसेच HP गॅस ग्राहकांचा उत्स्फूर्त प्रतिसाद मिळाला. आंदोलनानंतर प्रशासनाने तातडीने दखल घेत HP गॅस एजन्सीशी चर्चा केली. त्यानंतर आज शिरड शहापूर येथे ग्राहकांना गॅस सेवा उपलब्ध करून देण्यात आली. तसेच यापुढे प्रत्येक बुधवारी नियमितपणे गॅस गाडी पाठविण्यात येईल, असे आश्वासन एजन्सीकडून देण्यात आले.
या निर्णयामुळे परिसरातील ग्राहकांमध्ये समाधानाचे वातावरण निर्माण झाले असून नागरिकांनी वंचित बहुजन आघाडी तसेच अनिल कांबळे यांचे आभार व्यक्त केले. यावेळी जनतेच्या हक्कांसाठी संघर्ष सुरूच राहील, असा निर्धार वंचित बहुजन आघाडीच्या पदाधिकाऱ्यांनी व्यक्त केला.
