नाशिक : डॉ. बाबासाहेब आंबेडकर यांच्या जयंतीनिमित्त RSS कडून “भव्य महाआरती” कार्यक्रमाचे आयोजन करण्यात आले आहे. तशा पद्धतीचे पोस्टर समाज माध्यमांवर वायरल झाले आहे. वंचित बहुजन आघाडी (VBA) नाशिकच्यावतीने या विरोधात पोलिस प्रशासनाला निवेदन देण्यात आले आहे. हा कार्यक्रम तत्काळ रद्द करण्यात यावा, अशी मागणी निवेदनातून करण्यात आली आहे.
RSS च्या रामतीर्थ गोदावरी सेवा समितीच्या वतीने १४ एप्रिल रोजी सायंकाळी ६ वाजता गोदावरी घाट, नाशिक येथे “भव्य महाआरती” आयोजित करण्यात आली आहे. या कार्यक्रमात RSS प्रचारक रमेश पांडव उपस्थित राहणार असल्याचे समजले आहे.
मात्र, वंचित बहुजन आघाडीच्या पदाधिकाऱ्यांनी या कार्यक्रमाच्या स्वरूपावर आक्षेप घेतला असून, बाबासाहेबांच्या विचारसरणीशी विसंगत अशा धार्मिक स्वरूपाच्या उपक्रमांद्वारे त्यांची जयंती साजरी करणे अयोग्य असल्याचे त्यांनी नमूद केले आहे. त्यामुळे हा कार्यक्रम रद्द करून कायदा व सुव्यवस्था अबाधित ठेवावी, अशी मागणी करण्यात आली आहे.
या संदर्भात पोलिस प्रशासन काय निर्णय घेणार याकडे सर्वांचे लक्ष लागले आहे.
