कर्जत शहरातील व्यावसायिकांच्या प्रश्नावर आमरण उपोषण; व्यापारी असोसिएशनचा जाहीर पाठिंबा
कर्जत : कर्जत शहरातील मेन रोडवरील गेल्या सुमारे ५० वर्षांपासून सुरू असलेल्या दुकाने व टपऱ्यांच्या पुनर्वसनाच्या प्रश्नावर वंचित बहुजन आघाडीच्या वतीने नगरपंचायत कार्यालयासमोर आमरण उपोषण करण्यात आले. या आंदोलनाला कर्जत शहर व्यापारी असोसिएशनच्या वतीने जाहीर पाठिंबा देण्यात आला.
कर्जत शहरातील मेन रोडवरील अनेक दुकानदार व टपरीधारक गेल्या अनेक दशकांपासून याच व्यवसायावर आपल्या कुटुंबाचा उदरनिर्वाह चालवत आहेत. यातील अनेक व्यावसायिक आर्थिकदृष्ट्या दुर्बल असून भूमिहीन आहेत. मुलांचे शिक्षण, आई-वडिलांचे आजारपण, घरखर्च तसेच संपूर्ण कुटुंबाचा दैनंदिन उदरनिर्वाह या व्यवसायावरच अवलंबून आहे.
त्यामुळे कोणत्याही प्रकारचे पुनर्वसन न करता दुकाने व टपऱ्या हटविल्यास हजारो कुटुंबांवर विस्थापनाची वेळ येण्याची शक्यता आहे. तसेच या व्यवसायाशी संबंधित शेकडो तरुण बेरोजगार होऊ शकतात. प्रशासनाने या बाबींचा गांभीर्याने विचार करून संबंधित दुकानदार व टपरीधारकांचे योग्य पुनर्वसन करावे, अशी मागणी वंचित बहुजन आघाडीच्या वतीने करण्यात आली.
शहराचा विकास व्हावा, याला आमचाही पाठिंबा आहे. मात्र, विकासाच्या नावाखाली कोणालाही विस्थापित करून विकास साधता येणार नाही. अतिक्रमणाच्या नोटिसा देण्यापूर्वी संबंधित दुकानदार व टपरीधारकांचे योग्य पुनर्वसन करण्यात यावे, अशी भूमिका आंदोलनकर्त्यांनी मांडली.
वंचित बहुजन आघाडीच्या वतीने नगरपंचायत कार्यालय, कर्जत येथे सुरू करण्यात आलेले आमरण उपोषण नगराध्यक्ष सुनील शेलार आणि नगरपंचायत मुख्याधिकारी अक्षय जायभाय यांनी दिलेल्या लेखी आश्वासनानंतर मागे घेण्यात आले.
हे आमरण उपोषण वंचित बहुजन आघाडीचे राज्य कार्यकारणी सदस्य, राज्य प्रवक्ते तथा जामखेडचे नगरसेवक ॲड. डॉ. अरुण (आबा) जाधव यांच्या मार्गदर्शनाखाली करण्यात आले.
यावेळी वंचित बहुजन आघाडीचे जिल्हा युवक अध्यक्ष सोमनाथ भैलुमे, जिल्हा महासचिव तुकाराम पवार, संजय शेलार, जिल्हा उपाध्यक्ष लखन पारसे, युवक तालुकाध्यक्ष दत्ता भालेराव, जिल्हा संघटक चांगदेव आप्पा सरोदे, जिल्हा उपाध्यक्ष अंकुश साळवे, जिल्हा सल्लागार भारत साळवे, जिल्हा संघटक दिसेना पवार, कर्जत शहर व्यापारी असोसिएशनचे उपाध्यक्ष महावीर बोरा, सचिव प्रसाद शहा, सदस्य गणेश तोरडमल, ज्येष्ठ नेते चंद्रकांत नेटके सर, जिल्हा सल्लागार दादा समुद्र, माजी युवक तालुकाध्यक्ष पप्पू चव्हाण, कर्जत शहराध्यक्ष राहुल पोळ, माजी जिल्हा सल्लागार नंदकुमार गाडे सर, तसेच रवी सोनवणे, नवनाथ शिंदे, अजय लांडघुले, नुरा भोसले, रंगीता काळे, पार्वती भोसले, शितल काळे, शिवा काळे, अश्विनी काळे यांच्यासह वंचित बहुजन आघाडीचे पदाधिकारी, कार्यकर्ते व व्यापारी मोठ्या संख्येने उपस्थित होते.
