चांदूर बाजार : २०२३ पूर्वी उत्पादित झालेल्या वाहनधारकांच्या हिताचे संरक्षण करण्यासाठी देशातील सर्व पेट्रोल पंपांवर E20 सोबत E10 पेट्रोलचा कायमस्वरूपी पर्याय उपलब्ध करून द्यावा, तसेच E10 पेट्रोल, E20 पेट्रोल आणि डिझेलच्या किमती कमी कराव्यात, या प्रमुख मागण्यांसाठी वंचित बहुजन आघाडी व वंचित बहुजन युवा आघाडी, चांदूर बाजार यांच्या वतीने आज पंतप्रधान, भारत सरकार यांना उद्देशून तहसीलदार, चांदूर बाजार यांच्यामार्फत निवेदन सादर करण्यात आले.
निवेदनात नमूद करण्यात आले आहे की, २०२३ पूर्वीची बहुतांश वाहने E10 इंधन लक्षात घेऊन तयार करण्यात आली असून अशा वाहनांमध्ये दीर्घकाळ E20 पेट्रोलचा वापर केल्यास इंधन कार्यक्षमतेत घट, मायलेज कमी होणे, वाहनाच्या इंधन प्रणालीतील काही भागांची झीज वाढणे आणि देखभाल खर्चात वाढ होण्याची शक्यता असल्याने लाखो वाहनधारकांवर अतिरिक्त आर्थिक भार पडत आहे.
तसेच आंतरराष्ट्रीय बाजारात कच्च्या तेलाच्या किमतीत घट होऊनही पेट्रोल व डिझेलच्या दरात अपेक्षित कपात झालेली नाही. E20 पेट्रोलमध्ये इथेनॉलचे प्रमाण अधिक असल्यामुळे त्याची किंमत E10 पेक्षा कमी असावी, तसेच कच्च्या तेलाच्या किमती कमी झाल्याने E10 पेट्रोल आणि डिझेलचे दरही कमी करण्यात यावेत, अशी मागणी निवेदनातून करण्यात आली आहे.
शासनाने या मागण्यांवर तातडीने सकारात्मक निर्णय घ्यावा. अन्यथा सर्वसामान्य नागरिकांच्या हितासाठी वंचित बहुजन आघाडी व वंचित बहुजन युवा आघाडीच्या वतीने लोकशाही मार्गाने आंदोलन छेडण्यात येईल, असा इशाराही निवेदनातून देण्यात आला आहे.
यावेळी सुरज र. चव्हाण (तालुकाध्यक्ष, वंचित बहुजन युवा आघाडी) तोषल नव्हाळे (ता. महासचिव) हरिदास इंगळे, आकाश उके, सुधीर तायडे (ता. उपाध्यक्ष) पवन मनोहरे (ता.अध्यक्ष भारतीय बौद्ध महासभा), आकाश वानखडे, शुभम गाठे, धीरज तायडे, सागर मोहेकर, विकास मनोहरे, सिद्धार्थ तायडे, राहुल हिवराळे, भारत तायडे, किरण वानखडे आणि माणिक गजभे उपस्थित होते.
