नवी दिल्ली : जंतर-मंतर येथे प्रसिद्ध शास्त्रज्ञ सोनम वांगचुक यांनी सुरू केलेल्या उपोषणाची देशभरात चर्चा असून आज या आंदोलनाचा १९ वा दिवस आहे. या पार्श्वभूमीवर वंचित बहुजन आघाडीचे राष्ट्रीय अध्यक्ष ॲड. प्रकाश आंबेडकर यांनी आज जंतर-मंतर येथे जाऊन सोनम वांगचुक यांची भेट घेत त्यांच्या उपोषणाला पाठिंबा दर्शविला.
देशभरात गाजलेल्या नीट (NEET) पेपर लीक प्रकरणासह विविध स्पर्धा परीक्षांमधील पेपरफुटीच्या घटनांविरोधात सोनम वांगचुक यांनी दिल्लीतील जंतर-मंतर येथे उपोषण सुरू केले आहे. परीक्षा प्रक्रियेत पारदर्शकता आणणे, संपूर्ण परीक्षा प्रणालीत मूलभूत सुधारणा करणे आणि केंद्रीय शिक्षणमंत्री धर्मेंद्र प्रधान यांनी राजीनामा द्यावा, या त्यांच्या प्रमुख मागण्या आहेत.
ॲड. प्रकाश आंबेडकर यांनी आज सोनम वांगचुक यांची प्रत्यक्ष भेट घेतली. भेटीनंतर त्यांनी आपल्या अधिकृत एक्स (X) सोशल मीडिया खात्यावर पोस्ट करत म्हटले की, “आज नवी दिल्लीत सोनम वांगचुक यांची भेट घेऊन त्यांच्या आंदोलनाला आणि भूमिकेला माझी एकजूट व पाठिंबा व्यक्त केला.”
सोनम वांगचुक यांच्या आंदोलनाला विविध सामाजिक, शैक्षणिक आणि राजकीय क्षेत्रातील व्यक्तींकडून समर्थन व्यक्त केले जात आहे.
