अकोला: वंचित बहुजन आघाडी प्रदेश कार्यकारिणी निवडणुक गुरुवार, ३० जुलै रोजी पार पडली. अकोला शहरातील अशोक वाटिका येथील मतदान केंद्रावर पक्षाच्या जिल्ह्यातील सभासद मतदारांनी मतदान करीत, सहभाग नोंदविला. निवडणूक अधिकारी मिलिंद इंगळे आणि त्यांचे सहकारी यांनी अतिशय चोख आणि शिस्तबद्ध पद्धतीने निवडणूक प्रक्रिया पारदर्शक पद्धतीने पार पाडली.
वंचित बहुजन आघाडीच्या प्रदेश कार्यकारिणीच्या निवडणुकीत प्रदेशाध्यक्ष आणि १२ कार्यकारिणी सदस्य पदांसाठी राज्यातील प्रत्येक जिल्ह्याच्या ठिकाणी मतदान घेण्यात आले. अकोला येथे सकाळी ८ ते दुपारी ४ या वेळेत मतदान प्रक्रिया पार पडली. या निवडणुकीत अतिशय उत्साहात मतपत्रिकांद्वारे पक्षाच्या सभासद मतदारांनी पहिल्याच मतदानाचा हक्क बजावला.
अकोला जिल्हा एकूण मतदार ३०१४ होते. त्यामधून काल १४६० मतदारांनी मतदान केले. ही मतदानाची आकडेवारी ४८.४४% एवढी राहिली. अशोक वाटिका येथील मतदान केंद्रात मतदान करण्यासाठी ‘वंचित’च्या जिल्ह्यातील सभासद कार्यकर्त्यांची गर्दी झाली होती. वंचित कार्यकर्त्यांचा उत्साह आणि पाऊस ह्यामुळे काही काळ गोंधळ झालं. पण निवडणूक हाताळणाऱ्या कार्यकर्त्यांनी तो आटोक्यात आणला. प्रथमच मतदानातून प्रदेश कार्यकारणी येणार असल्याने प्रचंड आनंदाचे वातावरण पाहायला मिळाले.
निवडणूक अधिकारी म्हणून जिल्हा महासचिव मिलिंद इंगळे आणि इंजि धिरज इंगळे (सहाय्यक अकोला जिल्हा निवडणूक अधिकारी), प्रदीप चौरे (सहाय्यक अकोला जिल्हा निवडणूक), निलेश वाहुरवाघ, डॉ अशोक मेश्राम, रोशन फुंडकर, युवराज डोंगरे, चंद्रकांत तायडे, राजकुमार वाघ, राजेश वानखडे, निलेश झाडे, वाशिम भाई, मिलिंद आकोडे, विवेक काकड, अक्षय डोंगरे ह्यांनी कामकाज पाहिले. समता सैनिक दलाने संपूर्ण परिसर मध्ये चोख सुरक्षा व्यवस्था ठेवली होती. आता २ तारखेच्या मत मोजणी कडे संपूर्ण राज्यातील कार्यकर्त्यांचे लक्ष लागले आहे.
