औरंगाबाद : सार्वजनिक ठिकाणी विनापरवानगी सदस्य नोंदणी अभियान राबविणाऱ्या व्यक्तींवर गुन्हा दाखल करून कायदेशीर कारवाई करावी, अशी मागणी वंचित बहुजन युवा आघाडीच्या वतीने वेदांत नगर पोलीस ठाण्यात निवेदनाद्वारे करण्यात आली आहे.
निवेदनात म्हटले आहे की, दि. २४ जुलै रोजी रात्री सुमारे ९ वाजण्याच्या सुमारास वेदांत नगर येथील महाराष्ट्रीयन भोजनालयासमोरील सार्वजनिक रस्त्यावर चार पुरुष व एक महिला यांनी टेबल-खुर्च्या लावून आरएसएसची संघटनेचे सदस्य नोंदणी अभियान सुरू केले होते. हे अभियान कोणत्याही परवानगीशिवाय सार्वजनिक ठिकाणी राबविण्यात येत असल्याचे निदर्शनात आले.
तसेच संबंधित आरएसएसची संघटना अनधिकृत असल्यामुळे अशा प्रकारच्या उपक्रमांमुळे युवकांमध्ये चुकीचे वातावरण निर्माण होण्याची शक्यता असल्याचेही निवेदनात नमूद करण्यात आले आहे. त्यामुळे संबंधित व्यक्तींची चौकशी करून त्यांच्यावर योग्य त्या कायदेशीर तरतुदींनुसार गुन्हा दाखल करण्यात यावे तसेच संबंधित व्यक्तीवर कारवाई करण्यात यावी, अशी मागणी वंचित बहुजन युवा आघाडीने केली आहे.
दरम्यान, या प्रकरणी पोलीस प्रशासनाकडून निवेदनाची दखल घेऊन पुढील चौकशी व आवश्यक ती कार्यवाही करण्यात येणार असल्याची माहिती मिळाली आहे.
