वसई-विरार : वंचित बहुजन महिला आघाडी (वसई-विरार महानगरपालिका क्षेत्र) तर्फे आयोजित करण्यात आलेल्या “घे भरारी तुझ्या स्वप्नांची…” या शैक्षणिक व मार्गदर्शनपर उपक्रमाचा पाचवा वर्धापनदिन आणि गुणवंत विद्यार्थी सत्कार सोहळा शनिवारी (७ जून) उत्साहपूर्ण वातावरणात संपन्न झाला. या कार्यक्रमाला पालक आणि विद्यार्थ्यांनी मोठ्या संख्येने उपस्थिती लावून उपक्रमाला उत्स्फूर्त प्रतिसाद दिला.
कार्यक्रमाच्या प्रमुख मार्गदर्शिका म्हणून करिअर कौन्सिलर व अब्रॉड एज्युकेशन कन्सल्टंट मनाली महेश राऊत उपस्थित होत्या. त्यांनी विद्यार्थ्यांना परदेशातील उच्च शिक्षणाच्या संधी, प्रवेश प्रक्रिया, शिष्यवृत्ती तसेच विविध क्षेत्रांतील करिअरच्या वाटांबाबत सविस्तर मार्गदर्शन केले. त्यांच्या मार्गदर्शनामुळे विद्यार्थ्यांना भविष्यातील शैक्षणिक नियोजनासाठी महत्त्वपूर्ण दिशा मिळाली. यावेळी आयटी क्षेत्रातील तज्ज्ञ तथा बहुराष्ट्रीय कंपनीचे आयटी मॅनेजर महेश राऊत यांनी कार्यक्रमाला भेट देऊन महिला आघाडीच्या या स्तुत्य उपक्रमाचे कौतुक केले. तसेच सामाजिक क्षेत्रातील दिलीप जाधव आणि शिरसाट साहेब यांचीही प्रमुख उपस्थिती लाभली.
हा कार्यक्रम महिला आघाडीच्या अध्यक्षा गीता जाधव यांच्या अध्यक्षतेखाली पार पडला. कार्यक्रमाचे सूत्रसंचालन स्वरा भोसले यांनी केले. संपूर्ण कार्यक्रमाचे नियोजन आणि व्यवस्थापन महिला पदाधिकाऱ्यांनी अत्यंत शिस्तबद्ध पद्धतीने सांभाळले. कार्यक्रमाच्या यशस्वी आयोजनासाठी महासचिव साक्षी जाधव, छाया लोखंडे, कोषाध्यक्ष सरिता बिंद, सचिव कोमल पटणे, दिपाली जाधव, उपसंपर्कप्रमुख प्रियंका तिवारी, विरार शहर अध्यक्षा सारिका सकपाळ, रमाताई काटे, वैशाली शिर्के, विद्या पाटील, रोशनी गायकवाड आदी पदाधिकाऱ्यांनी विशेष परिश्रम घेतले.
