मडगाव (गोवा) : भारतीय महिला फुटबॉल संघाने दक्षिण आशियाई फुटबॉल चॅम्पियनशिप (SAFF Women’s Championship) मध्ये शानदार कामगिरी करत तब्बल सात वर्षांनंतर विजेतेपदावर आपले नाव कोरले. शनिवारी झालेल्या अंतिम सामन्यात भारताने गतविजेत्या बांगलादेशचा 3-1 अशा फरकाने पराभव करत विक्रमी सहावे विजेतेपद पटकावले.
गोव्यातील पंडित जवाहरलाल नेहरू स्टेडियमवर झालेल्या या अंतिम लढतीत भारताकडून प्यारी जाख्सा, सनफिदा नोंगरुम आणि लिंडा कोम सेर्तो यांनी प्रत्येकी एक गोल केला. बांगलादेशकडून रितु पोर्णा हिने एकमेव गोल केला. सामन्याच्या 42व्या मिनिटाला प्यारी जाख्साने भारताचे खाते उघडले. मात्र पहिल्या हाफच्या अतिरिक्त वेळेत रितु पोर्णाने गोल करत बांगलादेशला 1-1 अशी बरोबरी साधून दिली. दुसऱ्या हाफमध्ये भारताने आक्रमक खेळ कायम ठेवत 50व्या मिनिटाच्या सुमारास सनफिदा नोंगरुमच्या अचूक हेडरमुळे पुन्हा आघाडी घेतली. (SAFF Womens Championship 2026)
Also Read : मुशाफिरी यात्रेतून भटके-विमुक्त समाजाच्या जनगणनेचा प्रश्न ऐरणीवर; 78 वर्षांनंतरही स्मशानभूमीची सोय नाही – ॲड. डॉ. अरुण जाधव
यानंतर भारतीय संघाने खेळावर वर्चस्व राखले. सामन्याच्या 82व्या मिनिटाला लिंडा कोम सेर्तोने प्रतिस्पर्धी बचावफळीच्या चुकीचा फायदा घेत चेंडू जाळ्यात धाडला आणि भारताच्या विजयावर शिक्कामोर्तब केले.संपूर्ण स्पर्धेत भारतीय संघाने अप्रतिम सातत्य दाखवले. भारताने खेळलेले चारही सामने जिंकत एकूण 18 गोल केले, तर केवळ एकच गोल स्वीकारला. दुसरीकडे, सलग तिसऱ्यांदा विजेतेपद जिंकण्याचे बांगलादेशचे स्वप्न भारतीय संघाने धुळीस मिळवले.
पुरस्कारांमध्येही भारतीय खेळाडूंची चमक
स्पर्धेतील वैयक्तिक पुरस्कारांमध्येही भारतीय खेळाडूंनी बाजी मारली. अवेका सिंह हिने चार गोलांसह सर्वाधिक गोल करणाऱ्या खेळाडूचा मान मिळवला. सनफिदा नोंगरुम हिला स्पर्धेतील सर्वोत्कृष्ट खेळाडू (Most Valuable Player) म्हणून गौरवण्यात आले, तर पंथोई चानू एलांगबाम हिने सर्वोत्तम गोलकीपरचा पुरस्कार पटकावला. नेपाळच्या संघाला फेअर प्ले पुरस्कार प्रदान करण्यात आला. (SAFF Womens Championship 2026)
