पुणे: ससून रुग्णालय पुणे येथे एका कार्यक्रमादरम्यान भारतीय जनता पार्टीचे आमदार सुनील कांबळे यांनी कर्तव्य बजावत असलेल्या शिवाजी सरख या पोलीस कर्मचाऱ्याला कानशिलात लगावली होती. या विरोधात वंचित बहुजन युवा आघाडी आणि वंचित बहुजन माथाडी कामगार आघाडी यांच्या वतीने त्यांच्यावर गुन्हा नोंदवण्यात आला होता. याची दखल घेत बंडगार्डन पोलीस ठाण्यात आमदार सुनील कांबळे यांच्या विरोधात गुन्हा दाखल करण्यात आला आहे.
सदरील घटनेचा व्हिडिओ प्रसारमाध्यमांवर मोठ्या प्रमाणात प्रसारित झाल्यानंतर या घटनेची दखल वंचित बहुजन माथाडी ट्रान्सपोर्ट कामगार जनरल युनियन आणि वंचित बहुजन युवा आघाडीच्या पदाधिकाऱ्यांनी तात्काळ घेत सदर घटनेचा निषेध व्यक्त केला तसेच आमदार सुनील कांबळे यांच्यावर मारहाण करणे व पोलीस कर्मचाऱ्याला कर्तव्यापासून परवृत्त करणे या गुन्ह्यानुसार योग्य त्या कलमान अंतर्गत त्यांच्यावर गुन्हा दाखल करून कायदेशीर कारवाई करण्यात यावी अशा आशयाचे निवेदन दिले होते.
