बुलढाणा : महाराष्ट्र लोकसेवा आयोगाची (MPSC) परीक्षा ऑनलाइनऐवजी पूर्वीप्रमाणे ऑफलाइन पद्धतीनेच घेण्यात यावी, या प्रमुख मागणीसाठी वंचित बहुजन आघाडीच्या वतीने शुक्रवारी खामगाव येथील उपविभागीय अधिकारी यांना निवेदन सादर करण्यात आले. ऑनलाइन परीक्षा पद्धतीमुळे ग्रामीण भागातील तसेच आर्थिकदृष्ट्या दुर्बल विद्यार्थ्यांना अनेक अडचणींचा सामना करावा लागत असल्याचे निवेदनात नमूद करण्यात आले.
निवेदनाद्वारे राज्य शासन आणि महाराष्ट्र लोकसेवा आयोगाने विद्यार्थ्यांच्या हिताचा विचार करून MPSC परीक्षा ऑफलाइन पद्धतीने घेण्याचा निर्णय तातडीने घ्यावा, अशी मागणी करण्यात आली. स्पर्धा परीक्षांमध्ये पारदर्शकता, समान संधी आणि तांत्रिक अडचणींमुळे होणारा विद्यार्थ्यांचा त्रास टाळण्यासाठी ऑफलाइन परीक्षा हा अधिक विश्वासार्ह पर्याय असल्याचेही यावेळी अधोरेखित करण्यात आले. (Offline MPSC Exam)
Also Read : मोशी कचरा डेपो दुर्घटना : घनकचरा व्यवस्थापनासाठी स्वतंत्र विभागाची गरज; दोषींवर कारवाई करा – ॲड. प्रकाश आंबेडकर
या आंदोलनात धम्मगुरु भदंत राजज्योती, वंचित बहुजन आघाडीचे जिल्हाध्यक्ष देवा हिवराळे, विद्यार्थी संघटनेचे जिल्हाध्यक्ष मोहित दामोधर, तालुकाध्यक्ष शांताराम पाटेखेडे, तालुका महासचिव बाळू मोरे, तालुका सचिव बंडू इंगळे, शहराध्यक्ष आकाश सरदार, प्रशिक उमाळे, माजी शहराध्यक्ष धम्मपाल नितनवरे, शाश्वत अकॅडमीचे संस्थापक सागर वाकोडे, सामाजिक कार्यकर्ते गजानन हिवराळे, गौतम सुरवाडे, रामेश्वर तायडे यांच्यासह मोठ्या संख्येने विद्यार्थी व विद्यार्थिनी उपस्थित होते.
विशेष म्हणजे, या निवेदनावर वंचित बहुजन आघाडीचे पदाधिकारी, कार्यकर्ते तसेच मोठ्या संख्येने विद्यार्थी-विद्यार्थिनी यांच्या स्वाक्षऱ्या घेण्यात आल्या. विद्यार्थ्यांच्या भवितव्याशी संबंधित या प्रश्नावर शासनाने तातडीने सकारात्मक निर्णय घ्यावा, अन्यथा राज्यभर तीव्र लोकशाही मार्गाने आंदोलन छेडण्याचा इशाराही यावेळी देण्यात आला. (Offline MPSC Exam)
