वसई : प्रजासत्ताक दिनी नाशिक येथील शासकीय कार्यक्रमात भारतीय संविधानाचे शिल्पकार डॉ. बाबासाहेब आंबेडकर यांचे नाव जाणीवपूर्वक टाळणाऱ्या मंत्री गिरीश महाजन आणि त्या ‘मनुवादी’ मानसिकतेचा वसईत तीव्र निषेध करण्यात आला. वंचित बहुजन महिला आघाडीच्या वतीने यावेळी मंत्र्यांच्या वृत्तीचा ‘जोडे मारून’ निषेध व्यक्त करण्यात आला. या आंदोलनामुळे तहसील कार्यालय परिसर दणाणून गेला होता.
या निषेध आंदोलनामध्ये केवळ वंचित बहुजन आघाडीच नव्हे, तर भारताचा कम्युनिस्ट पक्ष (मार्क्सवादी-लेनिनवादी), प्रजा सुराज्य पक्ष आणि बहुजन विकास संघटना यांनीही सक्रिय सहभाग नोंदवून आपला पाठिंबा दर्शविला. (vanchit bahujan aghadi)
आंदोलक महिलांनी यावेळी संताप व्यक्त केला की, ज्यांच्या संविधानामुळे हा देश खऱ्या अर्थाने ‘प्रजासत्ताक’ झाला, त्या महामानवाच्या सन्मानासाठी आज आम्हाला रस्त्यावर उतरून मागणी करावी लागते, ही मोठी शोकांतिका आहे. १५ ऑगस्टचे सत्तांतर आणि २६ जानेवारीचे सार्वभौमत्व हे केवळ बाबासाहेबांच्या कष्टामुळे यशस्वी झाले आहे.
प्रशासनाला सादर केलेल्या निवेदनातील प्रमुख मागण्या-
१. शासनाच्या २०१७ च्या परिपत्रकानुसार (GR), सर्व शासकीय कार्यालयांत महामानवांच्या प्रतिमा पूजनाची काटेकोर अंमलबजावणी व्हावी.
२. डॉ. बाबासाहेब आंबेडकरांचा उल्लेख ‘भारतीय लोकशाहीचे जनक’ म्हणून होणे अनिवार्य करावे.
३. महामानवांना डावलणाऱ्या अधिकारी किंवा मंत्र्यांवर कायदेशीर कारवाई व्हावी.
या आंदोलनाचे नेतृत्व वंचित बहुजन महिला आघाडीच्या अध्यक्षा गीता जाधव आणि सचिव संगीता ताई सपकाळ यांनी केले. यावेळी साक्षी जाधव महासचिव, रेखा वाकोडे, संगीता लंकेश्वर, जितेंद्र शिरसाट, उपाध्यक्ष सुविध पवार, फिरोज शेख, अमोल गांगुड़े, विट्ठल गायकवाड़, आनंद जाधव, हनीफ शेख, विविध पक्षांचे पदाधिकारी आणि कार्यकर्ते मोठ्या संख्येने उपस्थित होते. (vanchit bahujan aghadi)
