औरंगाबाद : दौलताबाद पंचायत समितीच्या निवडणुकीत वंचित बहुजन आघाडीच्या वतीने रिंगणात उतरलेल्या तृतीयपंथी उमेदवार खुशबू शेख यांच्या प्रचारार्थ युवा नेते सुजात आंबेडकर यांची जाहीर सभा काल (दि. ४ फेब्रुवारी) उत्साहात पार पडली. या सभेत तरुणांची मोठी उपस्थिती आणि कार्यकर्त्यांच्या उत्साहाने खुलताबाद परिसर दणाणून गेला होता. यावेळी मोठ्या संख्येने नागरिकांची उपस्थिती होती.
सभेला संबोधित करताना सुजात आंबेडकर म्हणाले की, वंचित बहुजन आघाडी हा देशातील एकमेव असा पक्ष आहे जो खऱ्या अर्थाने समाजातील शेवटच्या घटकाला राजकीय प्रतिनिधित्व देण्याचे काम करत आहे. ज्यांना आजवर मुख्य प्रवाहापासून दूर ठेवले गेले, अशा दलित, आदिवासी, भटके-विमुक्त, ओबीसी, मुस्लिम, महिला आणि तृतीयपंथी समाजाला संधी देऊन सत्तेत सहभागी करून घेणे, हेच पक्षाचे मुख्य ध्येय आहे. (sujat ambedkar)
तृतीयपंथी समाजातील खुशबू शेख यांना उमेदवारी देऊन वंचितने पुन्हा एकदा आपले वेगळेपण सिद्ध केल्याचे सुजात आंबेडकरांनी आवर्जून सांगितले. स्थानिक विकास आणि सामाजिक न्यायासाठी नागरिकांनी या परिवर्तनाच्या लढ्यात खुशबू शेख यांच्या पाठीशी उभे राहावे, असे आवाहन त्यांनी यावेळी केले. (sujat ambedkar)
यावेळी या जाहीर सभेत अमित भुईगळ (राज्य कार्यकारिणी सदस्य तथा नगरसेवक), करुणा मेघानंद जाधव (नगरसेविका), ॲड. पंकज बनसोडे (औरंगाबाद पश्चिम शहराध्यक्ष), याशिवाय सभेला मोठ्या संख्येने पदाधिकारी, कार्यकर्ते आणि स्थानिक नागरिक उपस्थित होते. खुशबू शेख यांच्या या उमेदवारीमुळे दौलताबाद पंचायत समितीच्या निवडणुकीत आता मोठी चुरस निर्माण झाली आहे.
