औरंगाबाद : वंचित बहुजन आघाडी आणि समविचारी पक्षांच्या वतीने 23 मार्च रोजी नागपूर येथे राष्ट्रीय स्वयंसेवक संघाच्या मुख्यालयावर संयुक्त मोर्चा काढण्यात येणार आहे. या मोर्चात मोठ्या संख्येने नागरिकांना सहभागी होण्याचे आवाहन करण्यात आले आहे.
या पार्श्वभूमीवर औरंगाबाद येथे वंचित बहुजन आघाडी औरंगाबाद पश्चिम व पूर्व जिल्हा, तसेच शहर कार्यकारिणी पदाधिकारी व कार्यकर्त्यांची महत्त्वपूर्ण बैठक पार पडली. या बैठकीत मोर्चासाठी व्यापक जनजागृती करण्याचा निर्णय घेण्यात आला. अधिकाधिक नागरिकांपर्यंत मोर्च्याची माहिती पोहोचवून मोठ्या संख्येने सहभाग नोंदवण्याचे आवाहन यावेळी सर्व पदाधिकाऱ्यांनी केले. मोर्चासाठी औरंगाबाद येथून 22 मार्च रोजी सायंकाळी 5 वाजता क्रांती चौक येथील पक्ष कार्यालयातून सुमारे 50 चारचाकी वाहनांसह नागपूरकडे प्रस्थान करण्याचे नियोजन करण्यात आले आहे.
या बैठकीस जिल्हाध्यक्ष रुपचंद गाडेकर, पूर्व जिल्हाध्यक्ष रामेश्वर तायडे, जिल्हा निरीक्षक योगेश बन, शहराध्यक्ष पंकज बनसोडे, शहर उपाध्यक्ष शाहीर मेघानंद जाधव, महिला आघाडीच्या जिल्हाध्यक्षा कोमल हिवाळे, सम्यक विद्यार्थी आंदोलनाचे जिल्हाध्यक्ष अक्रम खान, जिल्हा महासचिव प्रविण हिवाळे, मंगेश निकम, जिल्हा उपाध्यक्ष साहेबराव चौतमल, जिल्हा संघटक खुशालराव बनसोडे, तालुका अध्यक्ष एस. पी. हिवराळे यांच्यासह अनेक पदाधिकारी व कार्यकर्ते मोठ्या संख्येने उपस्थित होते.
