पंजाब : पंजाबमध्ये मंगळवारी रात्री अल्पावधीत दोन वेगवेगळ्या ठिकाणी स्फोट झाल्याने राज्यातील सुरक्षा व्यवस्थेबाबत गंभीर प्रश्न उपस्थित झाले आहेत. जालंधर आणि अमृतसर येथे घडलेल्या या घटनांमुळे सीमावर्ती भागात तणावाचे वातावरण निर्माण झाले असून सुरक्षा यंत्रणा सतर्क झाल्या आहेत.
जालंधरमध्ये बीएसएफ (सीमा सुरक्षा दल) पंजाब फ्रंटियरच्या मुख्यालयाबाहेर उभी असलेली एक स्कूटर रात्री सुमारे ८.१५ वाजता अचानक स्फोटाने उडाली. स्फोटाचा आवाज मोठा असल्याने परिसरात काही काळ भीतीचे वातावरण पसरले. सुदैवाने या घटनेत कोणतीही जीवितहानी झाली नाही. प्राथमिक माहितीनुसार ही स्कूटर तेथील एका कर्मचाऱ्याची असल्याचे सांगितले जात आहे.
पोलीस आयुक्त धनप्रीत कौर यांनी सांगितले की, स्कूटरला प्रथम आग लागली आणि त्यानंतर स्फोट झाला. हा प्रकार तांत्रिक बिघाडामुळे झाला की यामागे कोणता घातपात आहे, याचा तपास पोलीस आणि बीएसएफकडून संयुक्तपणे सुरू आहे.
या घटनेनंतर अवघ्या दोन तासांत अमृतसरमधील खासा परिसरात, लष्करी छावणीच्या जवळ, रात्री सुमारे १०.३० वाजता दुसरा स्फोट झाला. हा स्फोटही जोरदार असल्याचे स्थानिकांनी सांगितले असून त्याचा आवाज दीड किलोमीटरपर्यंत ऐकू गेला. स्फोटाच्या धक्क्याने आसपासच्या घरांनाही कंप जाणवला. लष्करी परिसर असल्याने तात्काळ जवान आणि पोलिसांनी घटनास्थळी धाव घेत परिसर बंदोबस्ताखाली घेतला.
दोन्ही घटनांनंतर फॉरेन्सिक पथके तपासासाठी घटनास्थळी पोहोचली असून स्फोटाचे नेमके कारण आणि वापरलेले साहित्य याचा शोध घेतला जात आहे. जालंधर आणि अमृतसरमधील सीसीटीव्ही फुटेजही तपासण्यात येत आहे. या दोन स्फोटांमध्ये काही संबंध आहे का, याचाही शोध घेतला जात आहे. दरम्यान, संपूर्ण पंजाबमध्ये हाय अलर्ट जारी करण्यात आला आहे. नागरिकांनी घाबरून न जाता सावध राहावे, असे आवाहन प्रशासनाने केले आहे.
