प्रशासनाने यांची भरपाई करावी – ॲड.डॉ. अरुण जाधव
जामखेड : जामखेड तालुक्यातील खर्डा येथे चक्रीवादळ आणि जोरदार पावसामुळे खर्डा शहरालगत कानिफनाथ मंदिराच्या पायथ्याशी मंजूर असलेल्या यशवंतराव चव्हाण मुक्त वसाहतीमधील वीस घरकुलांचे काम चालू असताना ती घरे पडली. या घरांचे काम पत्रा लेवल पर्यंत आले होते.
या घरांचे काम चालू असल्याने तेथील मदारी बांधव हे पालाची झोपडी टाकून तिथे राहत होता. परंतु जोराच्या वाऱ्याने आणि पावसाने त्यांच्या पालाच्या झोपड्या देखील उडून गेल्या आहेत. यामुळे लहान मुले आणि वृद्ध यांची गैरसोय झाली आहे.
यावेळी वंचित बहुजन आघाडीचे आणि भटक्या विमुक्तांचे नेते ॲड.डॉ.अरुण जाधव यांनी ग्रामीण विकास केंद्र संस्थेच्या कार्यकर्त्यांना घेऊन तात्काळ खर्डा येथे चालू असलेले यशवंतराव चव्हाण मुक्त वसाहतीची पाहणी केली. तसेच मदारी बांधवांना धीर दिला. ते म्हणाले की, गेली 50 वर्षापासून भटक्या समाजातील मदारी बांधव खर्डा या ठिकाणी राहतो खूप गरीब व इमानदार समाज आहे. यांना जमीन घरकुल व्यवसाय नाही कला दाखवून शोभेचे वस्तू तयार करून भंगार, काच, पत्रा गोळा करून हा समाज उपजीविका भागवतो.
ॲड. जाधव म्हणाले कि, काल झालेल्या पावसामुळे यशवंतराव चव्हाण मुक्त वसाहत बांधकामाचे पडून खूप मोठ्या प्रमाणात नुकसान झाले आहे. गेले सात वर्षापासून यशवंतराव चव्हाण मुक्त वसाहतीसाठी कार्यकर्त्यांना घेऊन संघर्ष करत आलो आहे. अखेर मदारी बांधवांचे स्वप्न होते कि, घरे होतील व घरात जाऊन राहता येईल. मात्र हे स्वप्न अर्धवट राहिले आहे.
दानशूर व्यक्ती, कंपन्या, सामाजिक संस्था, तरुण मंडळे यांनी वीट, वाळू, पत्रे, खिडकी, दरवाजे, सिमेंट याची मदत करावी. तसेच जामखेड तालुक्याचे तहसीलदार, प्रांत, जिल्हाधिकारी, पंचायत समिती, बिडिओ आपण या घटनेची दखल घ्यावी आणि नुकसान भरपाई करावी.असे अहवान ॲड. जाधव यांनी केले आहे.
