Delhi News : राजधानी दिल्लीवर मोठा दहशतवादी हल्ला घडवण्याचा कट उघडकीस आला असून, दिल्ली पोलिसांच्या स्पेशल सेलने वेळेत कारवाई करत हा गंभीर डाव हाणून पाडला आहे. खेळण्याच्या कारमध्ये आयईडी (IED) स्फोटके लपवून साखळी स्फोट घडवण्याची योजना तयार करण्यात आली होती, अशी माहिती तपासातून समोर आली आहे.
या प्रकरणात महाराष्ट्रासह तीन वेगवेगळ्या राज्यांतून चार संशयितांना अटक करण्यात आली आहे. मोसैब अहमद, मोहम्मद हम्माद, शेख इमरान आणि मोहम्मद सोहेल अशी अटक करण्यात आलेल्यांची नावे आहेत. हे सर्वजण सोशल मीडियावरील गटांद्वारे एकमेकांच्या संपर्कात आले होते. विशेष म्हणजे, हे आरोपी सामान्य कामगार म्हणून वावरत होते—कोणी ऑटो मॅकेनिक, तर कोणी प्लंबर किंवा सुरक्षा रक्षक म्हणून काम करत होते. (Terror Plot Foiled in Delhi)
तपासादरम्यान त्यांच्या मोबाईलमधील चॅटमधून धक्कादायक माहिती समोर आली. दिल्लीतील महत्त्वाच्या ऐतिहासिक स्थळांबरोबरच अयोध्येतील राम मंदिर, भारतीय संसद आणि काही लष्करी ठिकाणे ही त्यांच्या संभाव्य निशाण्यावर होती. आरोपी रिमोट कंट्रोलच्या मदतीने आयईडी स्फोटके तयार करण्याच्या अंतिम टप्प्यात पोहोचले होते. पोलिसांनी त्यांच्या ताब्यातून बॉम्ब बनवण्यासाठी लागणारे साहित्य, खिळे आणि रिमोट कंट्रोल कार जप्त केली आहे. (Terror Plot Foiled in Delhi)
तसेच, लाल किल्ला आणि इंडिया गेट परिसराची रेकी केल्याचेही तपासात उघड झाले आहे. मोठ्या प्रमाणावर हल्ला घडवण्याचा कट आखण्यात आला होता, मात्र पोलिसांच्या सतर्कतेमुळे तो उधळून लावण्यात यश आले. प्राथमिक तपासानुसार, आरोपी कट्टरपंथी विचारांनी प्रेरित असल्याचे समोर येत आहे.
