Tragic Accident : उत्तराखंड जिल्ह्यात चंपावत येथे घडलेल्या एका दुर्दैवी अपघाताने संपूर्ण परिसर शोकमग्न झाला आहे. वार्षिक क्रीडा स्पर्धेपूर्वी सुरू असलेल्या सरावादरम्यान 20 वर्षीय पॉलिटेक्निक विद्यार्थ्याचा जीव गमवावा लागला. भालाफेकीच्या सरावात असताना चुकून फेकलेला भाला थेट त्याच्या गळ्यात घुसल्याने ही भीषण घटना घडली.
शनिवारी सकाळी गोरिलचौर मैदानावर विद्यार्थी विविध क्रीडा प्रकारांचा सराव करत होते. याच वेळी सोमेंद्र सिंह बोहरा हा विद्यार्थी फुटबॉल आणण्यासाठी मैदानाच्या दुसऱ्या टोकाकडे गेला. अनवधानाने तो भालाफेकीच्या पट्ट्यात पोहोचला आणि त्याच क्षणी फेकलेला भाला वाऱ्याच्या दिशेमुळे मार्ग बदलत त्याच्या गळ्यात घुसला. (Uttarakhand Tragic Accident)
घटनेनंतर तात्काळ त्याला रुग्णालयात नेण्यात आले, मात्र गंभीर जखमांमुळे डॉक्टरांनी त्याला मृत घोषित केले. या घटनेने कुटुंबीयांवर दुःखाचा डोंगर कोसळला आहे.
सोमेंद्र हा अग्निवीर भरतीची तयारी करत होता आणि नुकतीच त्याने लेखी परीक्षा उत्तीर्ण केली होती. त्याचे वडील गुजरातमध्ये कामगार म्हणून नोकरी करतात, तर तो आई आणि तीन बहिणींसह चंपावत येथे राहत होता. पोलीस या प्रकरणाचा तपास करत असून, अद्याप कोणतीही अधिकृत तक्रार नोंदवलेली नाही.
