रोजगाराच्या संधी कमी; लघुलेखक पदांवरून सरकारला घेराव
मुंबई : महाराष्ट्र सरकारने ‘लघुलेखक’ (स्टेनोग्राफर) संवर्गातील पदे ‘मृत’ घोषित केल्याच्या निर्णयावरून राजकीय वातावरण तापले असून वंचित बहुजन आघाडीने या निर्णयाचा तीव्र निषेध नोंदवला आहे. पक्षाच्या अधिकृत ट्विटर हँडलवरून यासंदर्भात कठोर भूमिका मांडण्यात आली.
वंचित बहुजन आघाडीने आपल्या ट्विटमध्ये म्हटले आहे की, सरकारच्या या निर्णयामुळे राज्यातील हजारो मेहनती विद्यार्थ्यांच्या भवितव्यावर गदा आली असून हा निर्णय पूर्णतः अन्यायकारक आहे. विद्यार्थ्यांच्या स्वप्नांचा बळी देणारा हा निर्णय त्वरित मागे घ्यावा, अशी ठाम मागणी करण्यात आली आहे.
पक्षाने सरकारसमोर दोन प्रमुख मागण्या ठेवल्या आहेत. त्यानुसार ‘लघुलेखक’ पदे तत्काळ कायम ठेवावीत आणि विद्यार्थ्यांच्या कष्टाचा व भवितव्याचा विचार करून हा निर्णय रद्द करावा, असे स्पष्ट करण्यात आले आहे.
तसेच, आधीच बेरोजगारीच्या समस्येला सामोरे जाणाऱ्या राज्यातील तरुणांच्या रोजगाराच्या संधी कमी करण्याचा हा प्रकार असल्याचा आरोप करत, अशा निर्णयांचे धाडस सरकारने करू नये, असा इशाराही वंचित बहुजन आघाडीने दिला आहे.
दरम्यान, या निर्णयावरून राज्यभरातील स्पर्धा परीक्षा देणाऱ्या विद्यार्थ्यांमध्ये नाराजीचे वातावरण असून, सरकारच्या भूमिकेकडे सर्वांचे लक्ष लागले आहे.
