Solapur: भारतीय बौद्ध महासभा व समता सैनिक दल सोलापूर जिल्ह्यातील पहिली ग्रामशाखा मांडेगाव (ता. बार्शी) येथे विविध सामाजिक आणि शैक्षणिक उपक्रम उत्साहात पार पडले. येथील जयभीम बुद्ध विहार येथे १ मे (बुद्ध पौर्णिमा) पासून ५ मे पर्यंत राष्ट्रीय अध्यक्ष महाउपासिका मीराताई आंबेडकर यांच्या वाढदिवसाचे औचित्य साधून ५ दिवसीय विशेष शिबिराचे आयोजन करण्यात आले होते.
या शिबिराला ‘संस्कार वर्ग’ असे नाव देण्यात आले असून, यात दररोज सायंकाळी ६ ते ८ या वेळेत मुलांना पाली भाषा व मराठी अनुवादाचे प्रशिक्षण देण्यात आले. लहान मुलांच्या उत्स्फूर्त सहभागामुळे ग्रामस्थांनी हे संस्कार वर्ग वर्षभर शालेय शिक्षणासोबतच सुरू ठेवावेत, अशी इच्छा व्यक्त केली आहे.
कार्यक्रमाची सुरुवात बुद्ध पौर्णिमेच्या दिवशी बुद्धरुपास पुष्प वाहून, भारतरत्न डॉ. बाबासाहेब आंबेडकर यांच्या प्रतिमेला हार घालून आणि बुद्ध वंदनेने करण्यात आली. कार्यक्रमाच्या सांगता समारंभात विविध मान्यवरांचा विशेष सत्कार करण्यात आला.
यामध्ये पोटनिवडणुकीत सरपंच म्हणून निवडून आलेल्या मीराताई देवदत्त मिरगणे यांना भारतीय संविधान देऊन सन्मानित करण्यात आले. तसेच पंढरपूरच्या माजी नगराध्यक्षा उज्वलाताई महादेव भालेराव यांनी त्यांच्या कार्यकाळात १० एकर जागा बुद्ध विहारासाठी राखीव ठेवल्याबद्दल त्यांचाही विशेष गौरव करण्यात आला. मुंबई पोलीस दलात भरती झाल्याबद्दल अधिराज भालेराव यांचाही सत्कार करण्यात आला.५ मे रोजी महाउपासिका मीराताई आंबेडकर यांचा वाढदिवस केक कापून आणि लहान मुलांना वाटप करून साजरा करण्यात आला.
या संपूर्ण उपक्रमाचे आयोजन जयभीम बुद्ध विहार मांडेगावची कार्यकारणी, अध्यक्ष रामभाऊ सोनवणे, सरचिटणीस कैलास सोनवणे, कोषाध्यक्ष राजेंद्र खुरंगळे, कार्यालयीन सचिव अमृतानंद सोनवणे आणि हिशोब तपासनीस रणजीत सोनवणे यांनी केले होते. याप्रसंगी बौद्धाचार्य ज्ञानदेव सोनवणे, राहुल ढावरे, गणेश चव्हाण, मंगल सोनवणे, रेखा सोनवणे, उर्मिला सोनवणे, करुणा सोनवणे, शीला जावळे, शोभा सोनवणे, येमा खुरंगळे, गौतम सोनवणे यांच्यासह मोठ्या संख्येने पदाधिकारी व ग्रामस्थ उपस्थित होते. शेवटी खीर दान करून कार्यक्रमाची सांगता करण्यात आली.
