MPSC 2026 : महाराष्ट्र लोकसेवा आयोगाने (MPSC) यापूर्वी गट-ब संयुक्त पूर्व परीक्षा २०२६ मध्ये अनुसूचित जाती (SC) प्रवर्गासाठी जागा शून्य ठेवल्याने मोठा वाद निर्माण झाला होता. त्यानंतर आता पुन्हा एकदा आयोगाच्या कारभारावर प्रश्नचिन्ह उपस्थित झाले आहे.
जा. क्र. १३२/२०२५ महाराष्ट्र नागरी सेवा राजपत्रित संयुक्त पूर्व परीक्षा २०२६ संदर्भातील शुध्दीपत्रक आयोगाच्या संकेतस्थळावर प्रसिद्ध करण्यात आले असून, त्यामध्ये पशुवैद्यकीय अधिकारी गट-अ मधील SC प्रवर्गाचे १ पद कमी करण्यात आल्याचे स्पष्ट झाले आहे.
यामुळे स्पर्धा परीक्षेची तयारी करणाऱ्या अनुसूचित जातीतील विद्यार्थ्यांमध्ये तीव्र नाराजी आणि संताप व्यक्त होत आहे. आधीच मर्यादित संधी, प्रचंड स्पर्धा आणि वर्षानुवर्षांची मेहनत असताना आरक्षणातील जागा कमी करण्याचा निर्णय नेमका कोणाच्या हितासाठी घेतला जात आहे? असा संतप्त सवाल विद्यार्थ्यांकडून उपस्थित केला जात आहे.
आरक्षण हा संविधानाने दिलेला अधिकार असताना, वारंवार SC प्रवर्गाच्या जागांमध्ये कपात होणे ही केवळ तांत्रिक चूक नसून सामाजिक न्यायाच्या तत्वांवर आघात असल्याची भावना उमटत आहे. “एका बाजूला सामाजिक समतेच्या घोषणा आणि दुसऱ्या बाजूला मागास घटकांच्या संधी कमी करण्याचे धोरण” असा आरोपही विद्यार्थ्यांकडून केला जात आहे.
वंचित बहुजन आघाडीने यापूर्वीच एमपीएससीच्या आरक्षण धोरणावर प्रश्न उपस्थित केले होते. आता पुन्हा SC प्रवर्गाचे पद कमी झाल्याने आयोग आणि राज्य सरकारने तात्काळ स्पष्टीकरण द्यावे, कमी केलेले पद पूर्ववत करावे आणि आरक्षणाबाबत पारदर्शक भूमिका जाहीर करावी, अशी मागणी जोर धरत आहे.
