बुलढाणा : बुलढाण्याचे शिवसेनेचे (शिंदे गट) आमदार संजय गायकवाड यांनी ‘शिवाजी कोण होता?’ या पुस्तकाच्या प्रकाशकाला फोनवर अश्लील शिवीगाळ आणि धमकी दिल्याचा प्रकार समोर आला आहे. हा राजकीय बालिशपणा असल्याच्या चर्चा आता सुरू झाल्या आहेत.
कॉ. गोविंद पानसरे लिखित ‘शिवाजी कोण होता?’ या पुस्तकातील मजकुरावर आमदार संजय गायकवाड यांनी आक्षेप घेतला होता. या पुस्तकात छत्रपती शिवाजी महाराजांचा एकेरी उल्लेख असल्याचे म्हणत त्यांनी प्रकाशक प्रशांत आंबी यांना थेट फोन केला.
या संभाषणादरम्यान आमदार गायकवाड यांनी प्रकाशकाला अश्लील भाषेत शिवीगाळ केली आणि धमकावले.
या घटनेची ऑडिओ क्लिप आता सोशल मीडियावर मोठ्या प्रमाणात व्हायरल झाली आहे. एका लोकप्रतिनिधीने सार्वजनिक जीवनात अशा प्रकारे अभद्र भाषेचा वापर करून धमकावल्यामुळे सध्या या प्रकरणाची जोरदार चर्चा सुरू आहे.
