मुंबई : टीईटी पेपरफुटीप्रकरणी शिक्षणमंत्री दादा भुसे यांनी नैतिक जबाबदारी स्वीकारून राजीनामा द्यावा, तसेच आंदोलनकर्त्यांना धमक्या देणे तात्काळ थांबवावे, अन्यथा पुन्हा दादा भुसे यांच्या मालेगाव येथील निवासस्थानासमोर राज्यव्यापी आंदोलन छेडण्यात येईल, असा इशारा सम्यक विद्यार्थी आंदोलनाने दिला आहे.
सम्यक विद्यार्थी आंदोलनाच्या वतीने १ जुलै रोजी मालेगाव येथे शिक्षणमंत्री दादा भुसे यांच्या निवासस्थानासमोर टीईटी पेपरफुटीच्या निषेधार्थ आंदोलन करण्यात आले होते. त्यानंतर झालेल्या बैठकीत टीईटी पेपरफुटी संदर्भातील १२ मागण्यांचे निवेदन दादा भुसे यांना देण्यात आले. तसेच या मागण्यांमध्ये टीईटी पेपरफुटीची नैतिक जबाबदारी स्वीकारून त्यांनी राजीनामा द्यावा, ही प्रमुख मागणी करण्यात आली होती.
आठ दिवसांच्या आत या मागण्या मान्य न झाल्यास दादा भुसे यांच्या निवासस्थानासमोर पुन्हा राज्यव्यापी आंदोलन करण्यात येईल, असा इशाराही आंदोलनाच्या वतीने देण्यात आला होता. दरम्यान, दादा भुसे यांच्या काही कार्यकर्त्यांकडून आंदोलनकर्ते व विद्यार्थ्यांना पुन्हा आंदोलनासाठी आल्यास मारहाण करण्याच्या धमक्या देण्यात आले. या कथित धमक्यांच्या निषेधार्थ मुंबई विद्यापीठासमोर आंदोलन करत दादा भुसे यांच्या पोस्टरला काळे फासण्यात आले.
यावेळी आंदोलनकर्त्यांनी, “धमक्यांना आम्ही घाबरणार नाही. आमच्या १२ मागण्या मान्य झाल्या नाहीत, तर पुन्हा दादा भुसे यांच्या घरासमोर आंदोलन करण्यात येईल,” असा इशारा दिला. या आंदोलनात वंचित बहुजन युवा आघाडीचे मुंबई प्रदेशाध्यक्ष सागर गवई, सम्यक विद्यार्थी आंदोलनाचे कल्याण-डोंबिवली महानगराध्यक्ष कमलेश उबाळे, आनंदराज घाटगे यांच्यासह पदाधिकारी व विद्यार्थी मोठ्या संख्येने उपस्थित होते.
