अकोला : साकेत (अयोध्या) नगरी ही प्राचीन काळात बौद्ध धम्माच्या प्रचार-प्रसाराचे प्रमुख केंद्र होती, असे प्रतिपादन भारतीय बौद्ध महासभेचे संस्कार विभाग प्रमुख तथा केंद्रीय शिक्षक प्रा. डी. एस. ननिर यांनी केले.
भारतीय बौद्ध महासभा, जिल्हा शाखा अकोला यांच्या वतीने रविवार, ६ सप्टेंबर रोजी अशोक वाटिका येथे आयोजित प्रवचन मालिकेतील नववे पुष्प प्रा. ननिर यांनी गुंफले. यावेळी त्यांनी ‘साकेत नगरीचा खरा इतिहास’ या विषयावर प्रवचन दिले.
प्रा. ननिर यांनी सांगितले की, साकेत नगरीला प्राचीन काळात बौद्ध धम्माच्या प्रसाराचे महत्त्वपूर्ण केंद्र मानले जात होते. चिनी प्रवासी फाह्यन आणि ह्युएनसांग यांनी साकेतला भेट दिली होती. त्यांच्या प्रवासवर्णनांमध्ये बौद्ध धम्माशी संबंधित अनेक महत्त्वपूर्ण नोंदी आढळतात, असे त्यांनी नमूद केले.
ऐतिहासिक, पौराणिक, सांस्कृतिक आणि आध्यात्मिक संदर्भ तसेच उपलब्ध पुराव्यांच्या आधारे प्रा. ननिर यांनी विषयाचे सविस्तर विवेचन केले. विविध उदाहरणे देत साकेत नगरीच्या इतिहासातील महत्त्वपूर्ण पैलू त्यांनी उपस्थितांसमोर मांडले.
कार्यक्रमाच्या अध्यक्षस्थानी भारतीय बौद्ध महासभेचे जिल्हाध्यक्ष आद. पी. जे. वानखडे सर होते. यावेळी कोषाध्यक्ष विजय जाधव, महिला अध्यक्ष इंदुताई मेश्राम यांच्यासह संस्थेचे पदाधिकारी, केंद्रीय शिक्षक, शिक्षिका आणि बौद्धाचार्य मोठ्या संख्येने उपस्थित होते.
याप्रसंगी डॉ. मेश्राम, राहुल इंगळे, जी. जे. इंगळे, भीमराव मोहोड, डी. बी. शेगावकर, सदाशिव मेश्राम, प्रा. एस. पी. वानखडे, पंचशील गजघाटे, राहुल गोटे, जयदेव खंडारे, राजेश दारोकार, विशाल बावस्कर, प्रकाश शिरसाट, भाऊसाहेब थोरात, संतोष रायबोले, प्रवीण वानखडे, वैशालीताई गोटे, माऊली धांडे आदी उपस्थित होते.
कार्यक्रमाचे सूत्रसंचालन महानगराध्यक्ष गोरखनाथ वानखडे यांनी केले. कांताताई थोरात यांनी प्रास्ताविक, तर प्रकाश शेगावकर यांनी आभार मानले.
