मुंबई : दलित समाजाला उद्देशून सार्वजनिक ठिकाणी तसेच सोशल मीडियावर केल्या जाणाऱ्या जातीयवादी शिव्यांचा व द्वेषपूर्ण वक्तव्यांचा वंचित बहुजन आघाडीचे राष्ट्रीय अध्यक्ष ॲड. प्रकाश आंबेडकर यांनी तीव्र शब्दांत निषेध केला आहे. जातीयवादी शिव्यांमुळे आम्ही गप्प बसणार नसून, अशा प्रत्येक कृतीतून संबंधितांची जातीयवादी मानसिकताच उघड होत असल्याचा निशाणा त्यांनी साधला.
ॲड. प्रकाश आंबेडकर यांनी आपल्या अधिकृत ‘एक्स’ अकाउंटवर पोस्ट करत जातीयवादी मानसिकतेवर कठोर टीका केली. सध्या दिल्लीत आरक्षण विरोधात सुरू असलेल्या आंदोलनाच्या पार्श्वभूमीवर मोठ्या प्रमाणात SC, ST समूहाला शिव्या गाळ केल्या जाताय.
दलित समाजाला उद्देशून वापरल्या जाणाऱ्या अपमानास्पद आणि जातीयवादी शिव्यांचा उल्लेख करत त्यांनी, तुम्ही विष ओकता तेव्हा आम्हाला कमकुवत करत नाही, तर तुमची स्वतःची जातीयवादी मानसिकता उघड करता, असा संदेश दिला.
ब्राह्मणवादी आणि मनुवादी मानसिकतेतून केल्या जाणाऱ्या शिव्यांमधून संबंधितांची मानसिकता स्पष्ट होत असल्याचे त्यांनी म्हटले. बाबासाहेब आंबेडकर, आरक्षण आणि दलित समाजाला लक्ष्य केले जाते, तेव्हा फुले-शाहू-आंबेडकरांचा विचार आणि सामाजिक न्यायाची चळवळ आजही किती आवश्यक आहे, याचीच जाणीव होते, असे त्यांनी स्पष्ट केले.
पुढे ते म्हणाले की, संविधान आणि आरक्षणाच्या माध्यमातून समानता निर्माण होत असून SC, ST आणि OBC समाजाची प्रगती होत असल्याने जातीयवादी मानसिकतेला हे पचत नसल्याचेही आंबेडकर यांनी आपल्या पोस्टमध्ये म्हटले आहे.
जेव्हा जेव्हा ब्राह्मणवादी आणि मनुवादी आम्हाला शिव्या द्याल, तेव्हा तेव्हा आम्ही जय भीम म्हणू, जय संविधान म्हणू, असा ठाम निर्धार त्यांनी व्यक्त केला. तसेच जातीयवादी शक्तींकडून कमी लेखण्याचा प्रयत्न झाला, तर अधिक शिक्षित होऊ, संघटित होऊ आणि आंदोलन करू, हा बाबासाहेब आंबेडकरांनी दिलेला मार्ग पुढे नेण्याचे आवाहनही त्यांनी केले.
जातीय द्वेषपूर्ण वक्तव्ये आणि अपमानास्पद शिव्या या समाजातील जातीय भेदभावाचे गांभीर्य अधोरेखित करतात. त्यामुळे सामाजिक न्याय, समानता आणि SC, ST व OBC समाजाच्या आरक्षणाची आवश्यकता अधिक ठळक होते, असेही ॲड. प्रकाश आंबेडकर म्हणाले.
