अमेरिकेतील लॉस एंजेलिस येथे सुरू असलेल्या 96th Academy Awards सोहळ्यात यंदाच्या ऑस्कर पुरस्कारांची घोषणा करण्यात आली. यावर्षी ‘वन बॅटल आफ्टर अनादर’ या चित्रपटाने सर्वोत्कृष्ट चित्रपटाचा ऑस्कर पटकावत मोठी बाजी मारली. या चित्रपटासाठी दिग्दर्शक पॉल थॉमस अँडरसन यांना सर्वोत्कृष्ट दिग्दर्शकाचा पुरस्कारही मिळाला.
सर्वोत्कृष्ट अभिनेत्याचा पुरस्कार मायकेल बी. जॉर्डन यांना ‘सिनर्स’ या चित्रपटातील प्रभावी भूमिकेसाठी मिळाला. तर ‘हॅमनेट’ या चित्रपटात विल्यम शेक्सपिअर यांच्या पत्नी अॅग्नेस शेक्सपिअरची भूमिका साकारणाऱ्या जेसी बकले यांना सर्वोत्कृष्ट अभिनेत्रीचा ऑस्कर मिळाला.
‘वन बॅटल आफ्टर अनादर’ या चित्रपटाला आणखी एक मोठा सन्मान मिळाला. या चित्रपटातील भूमिकेसाठी सीन पेन यांना सर्वोत्कृष्ट सहाय्यक अभिनेत्याचा पुरस्कार मिळाला. दरम्यान, ‘सिनर्स’ या चित्रपटासाठी दिग्दर्शक रायन कूगलर यांना सर्वोत्कृष्ट मूळ पटकथेचा ऑस्कर मिळाला. अमेरिकेतील प्रोहिबिशन काळाच्या पार्श्वभूमीवर आधारित ‘सिनर्स’मध्ये जुळ्या भावांची कथा असून श्वेत-अश्वेत संघर्ष हा चित्रपटाच्या कथानकाचा केंद्रबिंदू आहे. ‘वन बॅटल आफ्टर अनादर’ हा युद्धविरोधी (अँटी-वॉर) आशय असलेला चित्रपट असून युद्धाची पार्श्वभूमी असली तरी वडील-मुलीच्या नात्यावर भाष्य करणारी भावनिक कथा या चित्रपटात मांडण्यात आली आहे. वर्गसंघर्ष आणि वर्णभेद यांसारख्या गंभीर सामाजिक प्रश्नांवरही हा चित्रपट भाष्य करतो.
सर्वोत्कृष्ट सहाय्यक अभिनेत्रीचा पुरस्कार ‘वेपन्स’ चित्रपटासाठी एमी मॅडिगन यांना मिळाला. डॉक्युमेंटरी विभागात ‘मिस्टर नोबडी अगेन्स्ट पुतीन’ या माहितीपटाने सर्वोत्कृष्ट डॉक्युमेंटरी फीचरचा पुरस्कार पटकावला, तर ‘ऑल द एम्प्टी रूम्स’ या माहितीपटाने सर्वोत्कृष्ट डॉक्युमेंटरी शॉर्टचा ऑस्कर जिंकला.
प्रमुख पुरस्कार विजेते
सर्वोत्कृष्ट चित्रपट – वन बॅटल आफ्टर अनादर
सर्वोत्कृष्ट दिग्दर्शक – पॉल थॉमस अँडरसन (वन बॅटल आफ्टर अनादर)
सर्वोत्कृष्ट अभिनेता – मायकेल बी. जॉर्डन (सिनर्स)
सर्वोत्कृष्ट अभिनेत्री – जेसी बकले (हॅमनेट)
सर्वोत्कृष्ट सहाय्यक अभिनेता – सीन पेन (वन बॅटल आफ्टर अनादर)
सर्वोत्कृष्ट सहाय्यक अभिनेत्री – एमी मॅडिगन (वेपन्स)
सर्वोत्कृष्ट मूळ पटकथा – रायन कूगलर (सिनर्स)
सर्वोत्कृष्ट डॉक्युमेंटरी फीचर – मिस्टर नोबडी अगेन्स्ट पुतीन
सर्वोत्कृष्ट डॉक्युमेंटरी शॉर्ट – ऑल द एम्प्टी रूम्स
