मुंबई: ‘एपस्टीन फाईल्स’ प्रकरणावरून राज्यातील राजकीय वातावरण तापण्याची शक्यता आहे. या संदर्भात आंदोलनाची पुढील रणनीती ठरवण्यासाठी वंचित बहुजन आघाडीने आज, १० मार्च रोजी मुंबईत विरोधी पक्षांची महत्त्वपूर्ण बैठक बोलावली आहे. या बैठकीनंतर दुपारी १ वाजता वंचित बहुजन आघाडीचे राष्ट्रीय अध्यक्ष ऍड. प्रकाश आंबेडकर आणि इतर विरोधी नेते संयुक्त पत्रकार परिषद घेणार आहेत.
मिळालेल्या माहितीनुसार, या बैठकीला काँग्रेसचे प्रदेशाध्यक्ष हर्षवर्धन सपकाळ यांच्यासह इतर प्रमुख विरोधी पक्षांचे नेते उपस्थित राहणार आहेत. ‘एपस्टीन फाईल्स’ प्रकरणावरून सरकारला कशा प्रकारे धारेवर धरायचे आणि आंदोलनाचे स्वरूप काय असावे, यावर या बैठकीत सविस्तर चर्चा होणार आहे.
बैठकीत झालेल्या निर्णयांची माहिती देण्यासाठी दुपारी १ वाजता फोर्ट परिसरातील पक्ष कार्यालयात पत्रकार परिषद आयोजित करण्यात आली आहे. ही पत्रकार परिषद दुपारी १:०० वाजता वंचित बहुजन आघाडी पक्ष कार्यालय, पहिला मजला, ठाकरसी हाऊस, फॉरेन पोस्ट ऑफिस समोर, बेलार्ड इस्टेट, फोर्ट, मुंबई याठिकाणी होईल.
आगामी निवडणुकांच्या पार्श्वभूमीवर वंचित बहुजन आघाडी आणि काँग्रेससह इतर विरोधी पक्ष एकाच मंचावर येत असल्याने या बैठकीकडे राजकीय वर्तुळात चर्चा होत आहे.
