पुणे : शहरात गेल्या काही दिवसांपासून जाणवणाऱ्या उन्हाच्या चटक्यानंतर, आज दुपारी पुण्यात हवामानाने अचानक कूस बदलली. सोमवारी दुपारी ३ वाजेच्या सुमारास सोसाट्याचा वारा आणि ढगांच्या गडगडाटासह पुण्यासह पिंपरी-चिंचवड परिसरात मुसळधार पावसाने हजेरी लावली. या अवकाळी पावसामुळे वाढत्या तापमानापासून पुणेकरांना तात्पुरता दिलासा मिळाला असला, तरी जनजीवन मात्र विस्कळीत झाले आहे.
दुपारच्या सुमारास अचानक पाऊस सुरू झाल्याने रस्ते निसरडे झाले असून दृश्यमानता कमी झाली आहे. यामुळे शहरातील अनेक महत्त्वाच्या रस्त्यांवर वाहनांच्या रांगा लागल्या असून वाहतूक मंदावली आहे. अनेक ठिकाणी सखल भागात पाणी साचल्याने वाहनचालकांना कसरत करावी लागत आहे. (Pune Rain)
भारतीय हवामान विभागाने (IMD) वर्तवलेल्या अंदाजानुसार, महाराष्ट्रात आजपासून हवामानात मोठा बदल होणार होता. त्याप्रमाणेच पुण्यात पावसाने सुरुवात केली आहे. हवामान खात्याच्या माहितीनुसार, ३० मार्च ते ४ एप्रिल दरम्यान पावसाचा जोर कायम राहण्याची शक्यता आहे. (Pune Rain)
बदलत्या हवामानाचा अंदाज घेऊन प्रशासनाने नागरिकांना सतर्क राहण्याचे आवाहन केले आहे. विशेषतः विजांचा कडकडाट होत असताना झाडाखाली उभे न राहणे आणि घराबाहेर पडताना पावसाळी साहित्याचा वापर करण्याचे सुचवले आहे.
