दूषित पाण्यामुळे नागरिकांच्या आरोग्याशी खेळ थांबवा; अकोट फाईल ते हनुमान चौक जुनी पाईपलाईन तात्काळ बदला – निलेश देव

अकोला : शहरातील नागरिकांना स्वच्छ व सुरक्षित पाणीपुरवठा मिळणे हा त्यांचा मूलभूत अधिकार असून, तो उपलब्ध करून देणे ही महानगरपालिकेची थेट जबाबदारी आहे. मात्र अकोट फाईल तीन खांबे (प्रताप मार्बल) ते हनुमान चौक या दरम्यानची सुमारे १,९०० मीटर लांबीची १२ इंच पी.आय. पाईपलाईन अत्यंत जीर्ण, फुटक्या व धोकादायक अवस्थेत असल्याने नागरिकांच्या आरोग्याशी गंभीर तडजोड होत असल्याचा आरोप वंचित बहुजन आघाडीचे गटनेते निलेश देव यांनी केला आहे.

सन २००२ मध्ये शहरातील पाणीटंचाई लक्षात घेऊन वारी जलयोजनेअंतर्गत ही पाईपलाईन टाकण्यात आली होती. त्यानंतर शहराची लोकसंख्या मोठ्या प्रमाणात वाढली. सन २०२१ मध्ये अकोट फाईल तीन खांबे परिसरात नवीन पाण्याची टाकी उभारून नायगाव, शिडोळ, भरत नगर, शंकर नगर, लाडीस फाईल, बापू नगर, पंचशील नगर, दम्माणी, न्यू तापडिया नगर, खरप, डुंबे वाडी तसेच प्रभाग क्रमांक १, २ आणि ३ मधील हद्दवाढ भागांना पाणीपुरवठा सुरू करण्यात आला. मात्र वाढलेल्या लोकसंख्येचा विचार न करता आजही संपूर्ण भागाचा पाणीपुरवठा जुन्याच १२ इंच क्षमतेच्या पाईपलाईनवर अवलंबून आहे. (Akola Water Supply)

Also Read : दिव्यांग विद्यार्थ्यांच्या आंदोलनाला वंचित बहुजन आघाडीचा जाहीर पाठिंबा

याहून गंभीर बाब म्हणजे अकोला–अकोट रस्ता विस्तारीकरणाच्या कामादरम्यान अनेक ठिकाणी नाल्यांचे बांधकाम या पाईपलाईनवरून करण्यात आले. परिणामी जवळपास संपूर्ण १,९०० मीटर पाईपलाईन नाल्यांच्या खाली गेली असून अनेक ठिकाणी ती फुटलेल्या अवस्थेत आहे.

प्रत्यक्ष स्थळ पाहणीदरम्यान फुटलेल्या पाईपलाईनमधून नाल्यातील दूषित पाणी मिसळून ते थेट नागरिकांच्या घरांपर्यंत पोहोचत असल्याचे निदर्शनास आले. हा प्रकार केवळ प्रशासनाचा निष्काळजीपणा नसून नागरिकांच्या आरोग्याशी सुरू असलेला गंभीर खेळ असल्याची टीका निलेश देव यांनी केली. यामुळे जलजन्य व संसर्गजन्य आजारांचा धोका वाढून सार्वजनिक आरोग्याचा गंभीर प्रश्न निर्माण होऊ शकतो, अशी भीतीही त्यांनी व्यक्त केली.

विशेष म्हणजे सन २०२१ मध्ये नवीन पाण्याची टाकी उभारताना अमृत योजना किंवा इतर निधीतून ही जुनी पाईपलाईन बदलणे अपेक्षित होते. मात्र हा विषय दुर्लक्षित राहिल्याने आज नागरिकांना त्याची मोठी किंमत मोजावी लागत आहे. त्यामुळे अकोट फाईल तीन खांबे (प्रताप मार्बल) ते हनुमान चौक या दरम्यानची सुमारे १,९०० मीटर लांबीची जुनी १२ इंच पी.आय. पाईपलाईन तात्काळ बदलून तिच्या जागी १६ इंच क्षमतेची नवीन एच.डी.पी.ई. पाईपलाईन टाकण्यास मंजुरी द्यावी, अशी आग्रही मागणी त्यांनी केली आहे. (Akola Water Supply)

Also Read : खडकवासला: वंचित बहुजन आघाडीच्या पाठपुराव्याला यश; जे.पी. नगरमधील पथदिवे अखेर सुरू!

प्रशासनाने या विषयाकडे तातडीने लक्ष देऊन आवश्यक कार्यवाही करावी. अन्यथा नागरिकांच्या आरोग्याच्या प्रश्नावर लोकशाही मार्गाने तीव्र जनआंदोलन उभारण्यात येईल, असा इशाराही निलेश देव यांनी दिला.