अकोला : आज अकोला महानगरपालिकेच्या सभागृहात झालेल्या सर्वसाधारण सभेदरम्यान भारतरत्न डॉ. बाबासाहेब आंबेडकर सामाजिक विकास योजनेअंतर्गत डॉ. बाबासाहेब आंबेडकर खुले नाट्यगृहाच्या सर्वांगीण विकासाचा विषय उपस्थित करण्यात आला.
यावेळी वंचित बहुजन आघाडीचे गटनेते तथा नगरसेवक निलेश देव यांनी सभागृहात ठामपणे भूमिका मांडत सांगितले की, महानगरपालिकेच्या सर्वसाधारण सभा दिनांक १९ ऑगस्ट २०१६ मध्ये सदर खुले नाट्यगृहाच्या विकासासाठी महाराष्ट्र शासनाकडे १० कोटी रुपयांच्या निधीचा प्रस्ताव पाठविण्याचा विषय मंजूर करण्यात आला होता. मात्र अद्यापही या विषयावर अपेक्षित कार्यवाही झालेली दिसून येत नाही.
निलेश देव यांनी सभागृहाच्या निदर्शनास आणून दिले की, महाराष्ट्र राज्यात भारतरत्न डॉ. बाबासाहेब आंबेडकर यांच्या नावाने असलेले हे एकमेव खुले नाट्यगृह असून त्याचे जतन, संवर्धन व आधुनिक पद्धतीने विकास होणे ही सामाजिक व ऐतिहासिक जबाबदारी आहे.
सदर नाट्यगृहाचा विकास झाल्यास सामाजिक, सांस्कृतिक, शैक्षणिक तसेच विविध जनजागृती कार्यक्रमांना मोठे व्यासपीठ उपलब्ध होईल. तसेच शहराच्या सांस्कृतिक ओळखीतही भर पडेल.
याकरिता पूर्वी सभागृहात सादर करण्यात आलेला प्रस्ताव मंजुरीसाठी तातडीने पुढे पाठवून, भारतरत्न डॉ. बाबासाहेब आंबेडकर सामाजिक विकास योजनेअंतर्गत प्राधान्यक्रमाने निधी उपलब्ध करून विकासकाम हाती घ्यावे, अशी मागणी निलेश देव यांनी सभागृहात रेटून धरली.
