न्यायासाठी सदैव पाठीशी राहण्याचे आश्वासन; आरोपीवर कठोर कारवाईची मागणी
नांदेड : नांदेड शहरातील खोब्रागडे नगर परिसरात काही दिवसांपूर्वी एका अल्पवयीन बालिकेसोबत घडलेल्या गंभीर लैंगिक अत्याचाराच्या घटनेने परिसरात संतापाची लाट निर्माण झाली आहे. या घटनेची माहिती मिळताच वंचित बहुजन आघाडीच्या पदाधिकाऱ्यांनी पीडित बालिकेच्या कुटुंबीयांची भेट घेऊन त्यांना धीर दिला असून, न्याय मिळेपर्यंत कुटुंबाच्या पाठीशी ठामपणे उभे राहण्याचे आश्वासन दिले.
मिळालेल्या माहितीनुसार, खोब्रागडे नगर परिसरात राहणाऱ्या एका अल्पवयीन बालिकेला चाकूचा धाक दाखवून पूर्व गुन्हेगारी पार्श्वभूमी असलेल्या एका २८ वर्षीय आरोपीने तिच्यावर लैंगिक अत्याचार केला आहे. या घटनेची माहिती समोर आल्यानंतर परिसरात तीव्र संताप व्यक्त करण्यात आला. विशेषतः अल्पवयीन आणि मतिमंद बालिकेला लक्ष्य करण्यात आल्याने या प्रकरणाचे गांभीर्य अधिक वाढले आहे.
ही घटना समोर येताच वंचित बहुजन आघाडीच्या नगरसेवक प्रतिनिधि कुलदीप राक्षसमारे व पदाधिकाऱ्यांनी या प्रकरणाची दखल घेत पीडित कुटुंबीयांशी संपर्क साधला. कुटुंबाला कायदेशीर आणि सामाजिक आधार मिळावा, तसेच प्रकरणात कोणत्याही प्रकारची दिरंगाई होऊ नये यासाठी संबंधित यंत्रणेकडे पाठपुरावा सुरू केला. आरोपीविरुद्ध कठोर कायदेशीर कारवाई करून त्याला तातडीने अटक करण्याची मागणीही पदाधिकाऱ्यांनी केली होती.
दरम्यान, पोलिसांनी या प्रकरणात गुन्हा दाखल करून संशयित आरोपी आदिनाथ जाधव याला अटक केली आहे. मात्र, केवळ अटक करून प्रकरण संपत नाही, तर पीडितेला न्याय मिळण्यासाठी संपूर्ण तपास पारदर्शकपणे आणि वेगाने पूर्ण होणे आवश्यक असल्याची भूमिका वंचित बहुजन आघाडीच्या पदाधिकाऱ्यांनी व्यक्त केली आहे. प्रकरणातील पुरावे, पीडित बालिकेचे संरक्षण, कुटुंबाला आवश्यक मदत आणि न्यायालयीन प्रक्रियेत योग्य पाठपुरावा याकडे प्रशासनाने गांभीर्याने लक्ष द्यावे, अशी मागणी करण्यात आली.
वंचित बहुजन आघाडीचे जिल्हाध्यक्ष शंकर महाजन नेते शिवा नरंगले नगरसेवक अॅड शेख बिलाल पीडित बालिकेच्या कुटुंबीयांची भेट घेत त्यांच्या अडचणी जाणून घेतल्या. या कठीण प्रसंगी कुटुंबाने घाबरून जाऊ नये, न्यायासाठी आवश्यक ती सर्व मदत करण्यासाठी वंचित बहुजन आघाडी पक्ष त्यांच्या पाठीशी राहील, असे आश्वासन शिष्टमंडळाने दिले.
पीडित कुटुंबाला सामाजिक दबाव, आर्थिक अडचणी किंवा कायदेशीर प्रक्रियेमुळे कोणत्याही प्रकारची अडचण निर्माण होऊ नये यासाठी संघटनेच्या माध्यमातून आवश्यक पाठपुरावा केला जाईल, असेही पदाधिकाऱ्यांनी स्पष्ट केले. अल्पवयीन मुलींच्या सुरक्षेचा प्रश्न दिवसेंदिवस गंभीर होत असल्याने प्रशासनाने अशा घटनांकडे केवळ गुन्हा म्हणून न पाहता त्यामागील सामाजिक परिस्थितीचाही गांभीर्याने विचार करणे गरजेचे आहे. बालिकांच्या सुरक्षिततेसाठी प्रतिबंधात्मक उपाययोजना, संवेदनशील भागांमध्ये पोलिसांची गस्त, नागरिकांमध्ये जनजागृती तसेच पीडितांना तातडीची कायदेशीर व मानसिक आधारव्यवस्था उपलब्ध करून देणे आवश्यक आहे.
या घटनेतील पीडित बालिकेला न्याय मिळेपर्यंत वंचित बहुजन आघाडीचा पाठपुरावा सुरूच राहील, अशी भूमिका शिष्टमंडळाने व्यक्त केली. आरोपीविरुद्ध कायद्यानुसार कठोर कारवाई व्हावी आणि पीडित बालिकेला व तिच्या कुटुंबाला शासनाच्या नियमानुसार सर्व आवश्यक मदत मिळावी, अशी मागणीही यावेळी करण्यात आली.
