औरंगाबाद: वंचित बहुजन आघाडीच्या (VBA) वतीने युवा पिढीला, विशेषतः ‘जेन झी’ (Gen Z) युवावर्गाला सामाजिक आणि राजकीय चळवळीशी जोडण्यासाठी एका विशेष उपक्रमाची घोषणा करण्यात आली आहे. ‘जय भीम जेन झी’ (#JaiBhimGenZ) या अभियानाअंतर्गत युवा नेते सुजात आंबेडकर यांच्या प्रमुख उपस्थितीत मंगळवार, २९ सप्टेंबर रोजी औरंगाबाद (छत्रपती संभाजीनगर) येथे भव्य टाऊनहॉल बैठकीचे आयोजन करण्यात आले आहे.
वंचित बहुजन आघाडीने आपल्या अधिकृत एक्स (ट्विटर) हँडलवरून या कार्यक्रमाची घोषणा केली असून, या टाऊनहॉलचा एक आकर्षक टीझरसुद्धा रिलीज करण्यात आला आहे. “GEN Zला जय भीम ! The wait is over” अशा आक्रमक आणि उत्साही टॅगलाईनसह ही माहिती शेअर करण्यात आली आहे.
या टाऊनहॉलमध्ये सहभागी होण्यासाठी इच्छुक तरुणांना ऑनलाइन नोंदणी करावी लागणार आहे. नोंदणीची प्रक्रिया उद्या सकाळी ११ वाजल्यापासून सुरू होणार आहे.
आजच्या डिजिटल युगात ‘जेन झी’ या नव्या पिढीचे प्रश्न, त्यांचे विचार आणि राजकीय दृष्टिकोन पारंपरिक राजकारणापेक्षा वेगळा आहे. याच युवा पिढीला आंबेडकरी विचारसरणी आणि सामाजिक न्यायाच्या लढ्याशी जोडणे, हा या ‘टाऊनहॉल’चा मुख्य उद्देश आहे. या कार्यक्रमात सुजात आंबेडकर तरुणांशी थेट संवाद साधणार असून त्यांच्या प्रश्नांना उत्तरे देणार आहेत.
औरंगाबादमधील या टाऊनहॉलमुळे मराठवाड्यातील युवा वर्गात मोठा उत्साह पाहायला मिळत असून उद्यापासून सुरू होणाऱ्या नोंदणीसाठी तरुणांचा कसा प्रतिसाद मिळतो, याकडे सर्वांचे लक्ष लागले आहे.
टीझर पाहण्यासाठी येथे क्लिक करा.
