मुंबई : भारिप बहुजन महासंघापासून बाळासाहेब आंबेडकर यांचे एकनिष्ठ कार्यकर्ते, मार्गदर्शक मोहन खर्चन (नाना) यांचे अल्पशा आजाराने दुःखद निधन झाले. ते मुंबईचे रहिवासी असून, अनेक वर्षांपासून सामाजिक आणि आंबेडकरी चळवळीत सक्रियपणे कार्यरत होते.
मोहन खर्चन यांनी आपल्या कार्यातून सातत्याने महात्मा फुले, राजर्षी शाहू महाराज आणि डॉ. बाबासाहेब आंबेडकर यांच्या विचारांचा प्रसार करण्याचे काम केले. आंबेडकरी विचार आणि चळवळीशी त्यांची असलेली बांधिलकी कार्यकर्त्यांसाठी प्रेरणादायी होती.
त्यांच्या निधनाने एक जिव्हाळ्याचा सहकारी, मार्गदर्शक आणि आधारवड गमावला आहे, अशा भावना वंचित बहुजन आघाडीच्या वतीने व्यक्त करण्यात आल्या. त्यांच्या निधनाने आंबेडकरी चळवळीतील कार्यकर्त्यांमध्ये शोककळा पसरली असून, त्यांच्या जाण्याने मोठी पोकळी निर्माण झाली.
मोहन खर्चन (नाना) यांच्या सामाजिक आणि चळवळीतील योगदानाच्या आठवणी सदैव स्मरणात राहतील, असेही वंचित बहुजन आघाडीच्या वतीने सांगण्यात आले.
