मुंबई : मुंबईतील मेट्रो प्रकल्पाच्या सुरक्षिततेचा प्रश्न पुन्हा एकदा ऐरणीवर आला आहे. शनिवारी, १४ फेब्रुवारी २०२६ रोजी दुपारी सव्वा बाराच्या सुमारास मुलुंड (पश्चिम) येथील एलबीएस रोडवर मेट्रो-४ (ग्रीन लाईन) च्या बांधकामाचा सिमेंटचा मोठा स्लॅब (पॅरापेट) अचानक खाली कोसळला. या भीषण दुर्घटनेत एका व्यक्तीचा जागीच मृत्यू झाला असून, तीन ते चार जण गंभीर जखमी झाले आहेत. (Slab Collapse in Mulund)
नेमकी घटना काय?
मुलुंड अग्निशमन केंद्राजवळील राजीव (मिलान) स्ट्रीट भागात पियर क्रमांक P196 जवळ मेट्रोचे काम सुरू असताना हा अपघात घडला. उंचावरून काँक्रीटचा जड भाग थेट खालून जाणाऱ्या एका रिक्षावर आणि चारचाकी गाडीवर कोसळला. हा अपघात इतका भीषण होता की रिक्षाचा पूर्णपणे चक्काचूर झाला. यामध्ये एका व्यक्तीचा जागीच मृत्यू झाला, तर अन्य जखमींना तातडीने जवळच्या रुग्णालयात हलवण्यात आले. घटनेची माहिती मिळताच पोलीस प्रशासन आणि अग्निशमन दलाच्या गाड्या घटनास्थळी दाखल झाल्या. ढिगाऱ्याखाली अडकलेली वाहने बाहेर काढण्याचे काम युद्धपातळीवर सुरू करण्यात आले. या धक्कादायक अपघातानंतर एलबीएस रोडवरील वाहतूक पूर्णपणे बंद करण्यात आली असून, वाहतूक अन्य मार्गांवर वळवण्यात आली आहे. (Slab Collapse in Mulund)
यापूर्वीही मेट्रो प्रकल्पाच्या कामातील हलगर्जीपणाबाबत स्थानिक नागरिकांनी आणि तज्ज्ञांनी अनेकदा प्रश्न उपस्थित केले होते. आजच्या या दुर्घटनेमुळे मेट्रो प्रशासनाच्या सुरक्षिततेच्या दाव्यांची पोलखोल झाली आहे. भरवस्तीत आणि वर्दळीच्या रस्त्यावर काम सुरू असताना पुरेशी सुरक्षा यंत्रणा का नव्हती? असा संताप व्यक्त केला जात आहे. या दुर्घटनेनंतर परिसरात भीतीचे आणि तणावाचे वातावरण आहे. प्राथमिक तपासात ही घटना तांत्रिक बिघाडामुळे घडली की मानवी चुकीमुळे, हे अद्याप स्पष्ट झालेले नाही.
