रशियाजवळ शक्तिशाली भूकंप आणि त्सुनामी, पाठोपाठ ज्वालामुखीचा उद्रेक!

रशिया : रशियाजवळील पॅसिफिक महासागरात ८.८ रिश्टर स्केलचा एक तीव्र भूकंप झाला, ज्याने संपूर्ण प्रदेश हादरला. या भूकंपाची तीव्रता इतकी प्रचंड होती की, त्याने समुद्रात ४ मीटर (१३ फूट) उंचीच्या त्सुनामी लाटा निर्माण केल्या, ज्यांनी रशियाच्या पूर्व किनाऱ्यावर अक्षरशः थैमान घातले.
‎
‎भूकंपाचे तांडव आणि त्सुनामीचा कहर
‎
‎भूकंपानंतर आलेल्या या लाटांमुळे किनारी भागातील अनेक इमारतींचे मोठे नुकसान झाले. लोकांनी आपली घरे सोडून सुरक्षित ठिकाणी धाव घेतली. जपानमध्येही त्सुनामीचा अलर्ट जारी करण्यात आला होता. सुदैवाने, या घटनेत आतापर्यंत कोणत्याही मृत्यूची नोंद नाही, मात्र काही लोक जखमी झाल्याचे वृत्त आहे.
‎
‎ज्वालामुखीचा उद्रेक, स्थिती चिंताजनक
‎
‎विनाशाचे हे सत्र इथेच थांबले नाही. भूकंपाच्या काही तासांनंतर रशियाच्या कामचटका द्वीपकल्पात असलेला क्ल्युचेव्हस्कॉय ज्वालामुखी (Klyuchevskoy Volcano) अचानक सक्रिय झाला आणि त्याचा उद्रेक सुरू झाला. रशियन अकादमी ऑफ सायन्सेसच्या युनायटेड जिओफिजिकल सर्व्हिसने दिलेल्या माहितीनुसार, ज्वालामुखीच्या पश्चिमेकडील उतारावरून जळणारा लावा वेगाने खाली येत होता. आकाशात स्फोट आणि लाल चमक स्पष्टपणे दिसत होती.
‎
‎क्ल्युचेव्हस्कॉय ज्वालामुखी हा जगातील सर्वात सक्रिय ज्वालामुखींपैकी एक आहे. पेट्रोपावलोव्स्क-कामचत्स्की शहराच्या उत्तरेस सुमारे ४५० किलोमीटर अंतरावर हा ज्वालामुखी आहे. एकाच वेळी इतका मोठा भूकंप आणि पाठोपाठ ज्वालामुखीचा उद्रेक होणे ही एक अत्यंत दुर्मिळ नैसर्गिक घटना आहे. भूकंपामुळे ज्वालामुखी सक्रिय झाला का, याचा अभ्यास शास्त्रज्ञ करत आहेत.
‎
‎प्रशासन सतर्क, नागरिक चिंतेत
‎
‎या विनाशकारी घटनांमुळे संपूर्ण कामचटका प्रदेशात, विशेषतः पेट्रोपावलोव्स्क-कामचत्स्कीजवळील परिस्थिती चिंताजनक बनली आहे. प्रशासनाने बचाव पथकांना सतर्क केले असून, लोकांना सरकारी मार्गदर्शक तत्त्वांचे पालन करण्याचे आवाहन केले आहे. कोणत्याही आपत्कालीन परिस्थितीत त्वरित मदत पुरवण्यासाठी तयारी करण्यात आली आहे. परिसरात अजूनही आफ्टरशॉक आणि नवीन स्फोट होण्याची शक्यता असल्याने नागरिकांना सावध राहण्यास सांगण्यात आले आहे.
‎