भंडारा : साकोली येथे वंचित बहुजन महिला आघाडीच्या वतीने महात्मा ज्योतिराव फुले यांची जयंती उत्साहात साजरी करण्यात आली. कार्यक्रमाची सुरुवात जिलाध्यक्ष तनुजा अमित नागदेवे यांच्या हस्ते महात्मा फुले यांच्या प्रतिमेला हार अर्पण करून करण्यात आली.
यावेळी उपस्थितांनी महात्मा फुले यांच्या कार्याचा आढावा घेत त्यांच्या सामाजिक, शैक्षणिक आणि समतेच्या लढ्याची आठवण करून दिली. फुले यांच्या आयुष्यातील काही घटनांचा उल्लेख करत त्यांच्या संघर्षमय जीवनावर प्रकाश टाकण्यात आला. समाजातील अन्याय, अंधश्रद्धा आणि जातीय विषमता याविरोधात त्यांनी दिलेल्या लढ्याची जाणीव उपस्थितांना करून देण्यात आली.
तसेच सावित्रीबाई फुले यांच्या कार्यालाही विशेष अधोरेखित करण्यात आले. स्त्री शिक्षणाची मुहूर्तमेढ रोवून समाज परिवर्तनाची दिशा देणाऱ्या या दांपत्याच्या योगदानाबद्दल कृतज्ञता व्यक्त करण्यात आली. “विद्येविना मती गेली…” हा महात्मा फुले यांचा संदेश यावेळी उपस्थितांना स्मरण करून देण्यात आला.
कार्यक्रमाला चारूशीला मेश्राम, चित्रा मेश्राम, जोशना खोबरागडे, बबिता राऊत, यादोराव गणवीर, किशोर तागडे, वैभव मोटघरे, गणेश गजभिये, अमित नागदेवे, केवळराम उके, प्रेमचंद खोबरागडे यांसह अनेक कार्यकर्ते उपस्थित होते. कार्यक्रमाच्या शेवटी महात्मा फुले यांच्या विचारांचा प्रसार करण्याचा आणि शिक्षण व समतेचा संदेश समाजात पोहोचवण्याचा संकल्प उपस्थितांनी व्यक्त केला.
