मुंबई : कुर्ला एल विभागाच्या हद्दीतील विविध नागरी समस्यांबाबत वंचित बहुजन आघाडीचे स्वप्नील जवळगेकर यांनी प्रभारी सहाय्यक आयुक्तांची भेट घेऊन सविस्तर चर्चा केली. नागरिकांना भेडसावणाऱ्या समस्या तातडीने सोडवाव्यात, अशी मागणी यावेळी करण्यात आली.
हनुमान नगर, साबळे नगर, मदर डेअरी परिसर तसेच डॉ. बाबासाहेब आंबेडकर उद्यानातील विविध नागरी समस्यांकडे प्रशासनाचे लक्ष वेधण्यात आले. परिसरातील झाडांची होत असलेली कत्तल तात्काळ थांबवून संबंधितांवर कारवाई करावी, अशी मागणी करण्यात आली. तसेच कामचुकार अधिकाऱ्यांवर शिस्तभंगाची कारवाई करून नागरिकांची कामे वेळेत मार्गी लावावीत, अशीही मागणी जवळगेकर यांनी केली.
या मागण्यांवर प्रभारी सहाय्यक आयुक्तांनी सकारात्मक प्रतिसाद देत संबंधित समस्यांबाबत आवश्यक ती कार्यवाही करण्याचे आश्वासन दिले. यावेळी वंचित बहुजन आघाडीचे पदाधिकारी अश्विन आहिरे, अनिश वाघमारे, जितू गवई आणि सुजल भोसले उपस्थित होते.
