अहिल्यानगर : जामखेड पोलीस ठाण्याच्या हद्दीत साडेपंधरा वर्षांच्या अल्पवयीन मुलीवर अत्याचार झाल्याच्या प्रकरणातील फरार आरोपींना तातडीने अटक करण्याचे आदेश उपविभागीय पोलीस अधिकारी (डीवायएसपी) सुजितकुमार क्षीरसागर यांनी तपासी अधिकाऱ्यांना दिले आहेत. वंचित बहुजन आघाडीच्या शिष्टमंडळाने या प्रकरणी आक्रमक भूमिका घेत प्रशासनाची भेट घेतल्यानंतर पोलिसांनी प्रकरणाची गंभीर दखल घेतली.
या प्रकरणी भारतीय न्याय संहिता २०२३ तसेच पोक्सो कायद्यान्वये गुन्हा दाखल करण्यात आला आहे. मुख्य आरोपी लक्ष्मण नवनाथ साळवे याच्यासह रामदास साळवे आणि भरत साळवे हे आरोपी अद्याप फरार असल्याचा आरोप वंचित बहुजन आघाडीने केला आहे. हे आरोपी पीडित बालिकेच्या कुटुंबाला ‘केस मिटवून घ्या, नाहीतर जिथे दिसताल तिथे हातपाय तोडून जिवे मारू’ अशी थेट धमकी देऊन परिसरात दहशत निर्माण करत आहेत.
वंचित बहुजन आघाडीचे अहिल्यानगर जिल्हाध्यक्ष योगेश साठे यांच्या नेतृत्वाखालील शिष्टमंडळाने उप पोलीस अधीक्षक कार्यालयात भेट देऊन या प्रकरणी तातडीने कारवाई करण्याची मागणी केली. आरोपींना पुढील २४ ते ४८ तासांत अटक करून गजाआड करावे तसेच पीडित कुटुंबाला आवश्यक पोलीस संरक्षण द्यावे, अशी मागणी यावेळी करण्यात आली.
दरम्यान, मागणीची दखल घेत डीवायएसपी सुजितकुमार क्षीरसागर यांनी तपासी अधिकाऱ्यांना तपासाची चक्रे वेगाने फिरवून फरार आरोपींना तातडीने अटक करण्याचे निर्देश दिल्याचे वंचित बहुजन आघाडीने सांगितले. दिलेल्या मुदतीत आरोपींना अटक न झाल्यास वंचित बहुजन आघाडीच्या वतीने तीव्र आंदोलन छेडण्यात येईल. तसेच उप पोलीस अधीक्षक कार्यालयासमोर रस्ता रोको आंदोलन करण्याचा इशारा शिष्टमंडळाने दिला आहे.
यावेळी कर्जत तालुकाध्यक्ष पोपट शेटे, सुधीर ठोंबे, विजय गायकवाड, बुवासाहेब चव्हाण, अतिश पारवे, चंद्रकांत नेटके, अंकुश साळवे, दादा साळवे यांच्यासह वंचित बहुजन आघाडीचे पदाधिकारी, कार्यकर्ते आणि पीडित कुटुंबीय उपस्थित होते.
