Sports Photography : आसामच्या प्रसिद्ध फोटो जर्नलिस्ट गीतिका तालुकदार यांनी आंतरराष्ट्रीय क्रीडा पत्रकारितेत आणखी एक मोठी झेप घेतली आहे. फीफाने आगामी 2026 फुटबॉल वर्ल्ड कप स्पर्धेच्या अधिकृत कव्हरेजसाठी त्यांची निवड केली असून, पुरुषांच्या फीफा वर्ल्ड कपचे कव्हरेज करण्याची त्यांना सलग तिसऱ्यांदा संधी मिळाली आहे. विशेष म्हणजे, यंदाच्या स्पर्धेसाठी भारतीय मीडिया प्रतिनिधींमध्ये निवड झालेल्या त्या भारतातील एकमेव महिला फोटो जर्नलिस्ट ठरल्या आहेत. त्यामुळे भारतीय क्रीडा पत्रकारितेसह ईशान्य भारतासाठीही ही अभिमानाची बाब मानली जात आहे.
गीतिका तालुकदार यांनी यापूर्वी 2018 मधील रशिया फीफा वर्ल्ड कप, 2022 मधील कतार वर्ल्ड कप, 2019 महिला फीफा वर्ल्ड कप, 2023 महिला वर्ल्ड कप, टोकियो ऑलिम्पिक आणि पॅरिस ऑलिम्पिक यांसारख्या जागतिक क्रीडा स्पर्धांचे यशस्वी छायाचित्रण केले आहे.
त्यांच्या कॅमेऱ्यातून टिपलेले अनेक क्षण आंतरराष्ट्रीय स्तरावर चर्चेत राहिले आहेत. या निवडीबद्दल प्रतिक्रिया देताना गीतिका तालुकदार म्हणाल्या की, फीफा वर्ल्ड कपसारख्या ऐतिहासिक स्पर्धेसाठी पुन्हा अधिकृत मान्यता मिळणे हा माझ्यासाठी अत्यंत अभिमानाचा आणि भावनिक क्षण आहे. क्रीडा छायाचित्रणाविषयी असलेली आवड आणि समर्पण यामुळेच हा प्रवास शक्य झाला.
Also Read : सोशल मीडिया युजर्ससाठी मोठी बातमी! इन्स्टाग्राम, फेसबुक आणि व्हॉट्सॲपसाठी मेटाने आणले ‘पेड सबस्क्रिप्शन’ प्लॅन्स
अमेरिका, कॅनडा आणि मेक्सिको यांच्या संयुक्त विद्यमाने होणारा 2026 फीफा वर्ल्ड कप हा स्पर्धेच्या इतिहासातील सर्वात मोठा वर्ल्ड कप मानला जात आहे. या स्पर्धेत तब्बल 48 देश सहभागी होणार असून, जागतिक माध्यमांचाही मोठ्या प्रमाणावर सहभाग असणार आहे.
गीतिका तालुकदार पुढील महिन्यात जूनमध्ये या बहुचर्चित फुटबॉल स्पर्धेच्या कव्हरेजसाठी रवाना होणार आहेत.
