गाझामध्ये उपासमारीचा हाहाकार: २४ तासांत १४ मृत्यू, मृतांमध्ये नवजात बालकांचा समावेश

‎‎गाझामध्ये उपासमारीची भीषण परिस्थिती निर्माण झाली असून, गेल्या २४ तासांत एका नवजात बाळासह किमान १४ जणांचा मृत्यू झाला आहे. गाझा आरोग्य मंत्रालयाच्या सोमवारी दिलेल्या माहितीनुसार, इस्रायलने गाझा पट्टीत पॅलेस्टिनी लोकांना अन्न आणि मदत पोहोचण्यापासून रोखल्याने ही स्थिती उद्भवली आहे. इस्रायलने मदत थांबवल्यापासून उपासमारीने मृत्यू झालेल्यांची एकूण संख्या १४७ वर पोहोचली आहे, ज्यात ८८ लहान मुलांचा समावेश आहे. स्थानिक अधिकाऱ्यांनी दिलेल्या माहितीनुसार, इस्रायलच्या नाकेबंदीमुळे सुमारे ४०,००० लहान मुलांचा जीव धोक्यात आला आहे.
‎
‎अन्न आणि मदतीवर इस्रायलची बंदी
‎
‎मार्च २०२५ पासून इस्रायलने उपासमारीने ग्रस्त असलेल्या पॅलेस्टिनी लोकांसाठी सर्व प्रकारच्या अन्न आणि मदतीवर पूर्णपणे बंदी घातली आहे. सोमवारी सकाळी मृत्यूमुखी पडलेल्यांमध्ये नवजात बाळ मोहम्मद इब्राहिम अदास याचाही समावेश होता. त्याचा मृत्यू गंभीर कुपोषण आणि शिशु फॉर्म्युल्याच्या अभावामुळे झाल्याचे गाझाच्या युद्धग्रस्त अल-शिफा रुग्णालयाच्या अधिकाऱ्यांनी सांगितले.
‎
‎जागतिक स्तरावर चिंता आणि विरोध
‎
‎अल-शिफा रुग्णालयाचे संचालक मुहम्मद अबू सलमिया यांनी हजारो लोकांचा अशाच प्रकारे मृत्यू होण्याची भीती व्यक्त केली आहे. त्यांनी अल जजीराला सांगितले की, गाझा पट्टीतील सर्व भाग उपासमारीच्या गंभीर टप्प्यावर पोहोचला असल्याने आम्ही मृत्यूंमध्ये वेगाने वाढ होण्याचा इशारा देत आहोत.
‎
‎उपासमारीने मृत्यू होणाऱ्या लोकांची संख्या वाढत असताना, जगभरात इस्रायलच्या निर्बंधांना विरोधही वाढला आहे. इस्रायलचे समर्थक मानले जाणारे अमेरिकेचे राष्ट्राध्यक्ष डोनाल्ड ट्रम्प यांनीही सोमवारी गाझावरील आपली भूमिका बदलली आहे. मानवतावादी परिस्थितीबद्दल चिंता व्यक्त करत, ट्रम्प यांनी इस्रायली नेते नेतन्याहू यांना तातडीने मदत पाठवण्याचे आवाहन केले आहे. लहान मुलांच्या धक्कादायक फोटोनंतर त्यांनी ही भूमिका घेतल्याचे बोलले जात आहे. गाझामधील ही भीषण परिस्थिती कधी निवळेल आणि तिथल्या लोकांना वेळेवर मदत मिळेल का, हा प्रश्न आता जगभरातील मानवतेपुढे उभा आहे.