फ्रान्स राफेल विमानाचे सोर्स कोड शेअर करणार नाही; पाकिस्तानविरुद्धच्या युद्धात आपले वैमानिक मारले जावेत अशी मोदींची इच्छा आहे ?

मुंबई : अलीकडील एका फ्रेंच अहवालात भारताला राफेल लढाऊ विमानांच्या मुख्य इलेक्ट्रॉनिक आणि इलेक्ट्रॉनिक वॉरफेअर प्रणालींचा सोर्स कोड मिळणार नसल्याचे उघड झाले आहे. यावर वंचित बहुजन आघाडीचे राष्ट्रीय अध्यक्ष प्रकाश आंबेडकर यांनी केंद्र सरकारवर केंद्र सरकारवर अत्यंत गंभीर आरोप करत राफेल कराराला “भारतविरोधी” संबोधले आहे.

सदर अहवालानुसार Thales निर्मित RBE2 AESA रडार, मॉड्युलर मिशन कॉम्प्युटर, मॉड्युलर डेटा प्रोसेसिंग युनिट (राफेलचे ब्रेन) तसेच SPECTRA इलेक्ट्रॉनिक वॉरफेअर सूट यांसारख्या अत्यावश्यक प्रणालींचा सोर्स कोड भारताला देण्यात येणार नाही. (prakash ambedkar)

१९ फेब्रुवारी २०२६ रोजी केलेल्या आपल्या ट्विटमध्ये आंबेडकर यांनी पंतप्रधान नरेंद्र मोदी आणि संरक्षणमंत्री राजनाथ सिंह यांना उद्देशून पाच महत्त्वाचे प्रश्न उपस्थित केले होते. “भारताला राफेलचा सोर्स कोड मिळणार आहे का? शंभर टक्के तंत्रज्ञान हस्तांतरणाची हमी आहे का?” असे थेट सवाल त्यांनी विचारले होते.

फ्रेंच अहवालानंतर “आज माझी भीती खरी ठरली आहे. भारताला राफेलचा सोर्स कोड मिळणार नाही,” असे ते म्हणाले. अलीकडील भारत-पाकिस्तान संघर्षाच्या संदर्भात भारतीय हवाई दलाकडे सोर्स कोडचा अभाव हा पाकिस्तानविरुद्ध गंभीर सामरिक तोटा ठरल्याचा आरोप त्यांनी केला. (prakash ambedkar)

“युद्धाच्यावेळी भारतीय अस्त्र किंवा ब्रह्मोससारखी क्षेपणास्त्रे स्वतंत्रपणे एकत्रित करता येत नाहीत अशा लढाऊ विमानावर करदात्यांचे ३६ अब्ज डॉलर्स का खर्च केले जात आहेत?” असा सवाल उपस्थित करत त्यांनी ‘आत्मनिर्भर भारत’ संकल्पनेवरही प्रश्नचिन्ह उपस्थित केले. हा करार पुढील ४० वर्षांसाठी भारताची आघाडीची हवाई हल्ला क्षमता फ्रान्सच्या मनःस्थितीवर अवलंबून ठेवतो, असा दावा त्यांनी केला.

“मोदी पाकिस्तान आणि चीनला युद्धात भारतावर आघाडी घ्यायची इच्छा बाळगतात का? मोदी आपल्या वैमानिकांचा मृत्यू व्हावा अशी इच्छा बाळगतात का?” अशा तीव्र शब्दांत त्यांनी केंद्र सरकारला लक्ष्य केले. तसेच अमेरिकेचे राष्ट्राध्यक्ष डोनाल्ड ट्रम्प यांच्या दबावाखाली हा करार करण्यात आला आहे का, असा सवालही त्यांनी उपस्थित केला. (prakash ambedkar)