भोर : भोर तालुक्यातील भोंगवली गावात प्रस्तावित असलेल्या पुणे ट्रान्समिशन ३ या खासगी कंपनीच्या हाय-व्होल्टेज सबस्टेशन आणि टॉवर लाईन प्रकल्पाला विरोध करत शेतकऱ्यांनी रविवारी ( दि.२३) पुणे-सातारा महामार्गावरील कापूरहोळ परिसरात रास्तारोको आंदोलन सुरू केले. या आंदोलनात मोठ्या संख्येने शेतकरी व ग्रामस्थ सहभागी झाले होते. यावेळी सहभागी शेतकऱ्यांनी रस्त्यात बसून आंदोलन केले.
‘हाय-व्होल्टेज सबस्टेशन हटवा’, ‘भोर-राजगड वाचवा’, ‘अदानी हटाओ’, ‘सबस्टेशन होऊ देऊ नका’, अशा आशयाचे फलक हातात घेत शेतकऱ्यांनी घोषणाबाजी केली. प्रस्तावित हायटेंशन टॉवर लाईनमुळे सुपीक शेतजमिनी बाधित होणार असून शेतकऱ्यांच्या शेतीवर त्याचा परिणाम होईल, असा आक्षेप आंदोलकांनी घेतला आहे.
भोंगवली गावात उभारण्यात येणारा हाय-व्होल्टेज सबस्टेशन आणि टॉवर लाईनचा प्रकल्प तातडीने रद्द करावा, या प्रमुख मागणीसाठी हे आंदोलन करण्यात येत आहे. प्रकल्पामुळे शेतजमिनी, शेतीचे उत्पादन आणि स्थानिक पर्यावरणावर परिणाम होण्याची भीती शेतकऱ्यांनी व्यक्त केली आहे.
या आंदोलनाच्या पार्श्वभूमीवर १५ ऑगस्ट रोजी आंदोलनात सहभागी शेतकऱ्यांनी वंचित बहुजन आघाडीचे राष्ट्रीय अध्यक्ष ॲड. प्रकाश आंबेडकर यांची भेट घेतली होती. भोर येथील महिला सरपंचांनीही त्यांची भेट घेऊन या प्रश्नावर चर्चा केली. यावेळी ॲड. प्रकाश आंबेडकर यांच्यासोबत सकारात्मक चर्चा झाली असून वंचित बहुजन आघाडी शेतकऱ्यांच्या पाठीशी राहील, असे आश्वासन देण्यात आले.
भोंगवली गावातील शेतकरी आणि वंचित बहुजन आघाडीचे कार्यकर्ते विठ्ठल गायकवाड हे आंदोलनाचे नेतृत्व करत आहेत. या आंदोलनासाठी भोर तालुक्यात ‘शेतकरी संघर्ष समिती’ स्थापन करण्यात आली असून समितीच्या माध्यमातून आंदोलनाला दिशा देण्यात येत आहे.
