मालेगाव: माळमाथ्याच्या अवर्षणग्रस्त भागातून उंच भरारी घेत प्रेरणा खवळे हिने केंद्रीय लोकसेवा आयोगाच्या (यूपीएससी) परीक्षेत यश मिळवत आपल्या कुटुंबासह आपल्या गावाचा अभिमान वाढवला आहे. मालेगाव तालुक्यातील कळवाडी येथील शेतकरी कैलास खवळे आणि सुनिता खवळे यांची कन्या असलेल्या प्रेरणाने देशात ९१३ वा क्रमांक मिळवत यश संपादन केले. माळमाथा परिसरातून यूपीएससी परीक्षा उत्तीर्ण होणारी ती पहिली तरुणी ठरली आहे. तिच्या या यशामुळे परिसरात आनंदाचे वातावरण असून ग्रामस्थांकडून तिच्यावर अभिनंदनाचा वर्षाव होत आहे.
प्रेरणाचे आई-वडील दहावीपर्यंत शिक्षित असले तरी त्यांनी आपल्या मुलांना चांगले शिक्षण मिळावे यासाठी सातत्याने प्रयत्न केले. प्रेरणासह कुटुंबात चार भावंडे आहेत. तिचे प्राथमिक शिक्षण मालेगावातील कॅम्प परिसरातील महात्मा गांधी विद्यामंदिर संस्थेच्या भारत विद्यालयात झाले. नवोदय परीक्षा उत्तीर्ण झाल्यानंतर पुढील शिक्षणासाठी ती दिंडोरी तालुक्यातील खेडगाव येथे गेली आणि तेथे बारावीपर्यंत शिक्षण पूर्ण केले. (UPSC result)
बारावीनंतर प्रेरणाच्या आयुष्याला नवी दिशा मिळाली. लहानपणापासूनच तिच्या आई-वडिलांची इच्छा होती की मुलगी अधिकारी बनावी. या स्वप्नाला साकार करण्यासाठी प्रेरणाने पदवी शिक्षणासाठी कोल्हापूर येथे आरसीएसएम कॉलेज ऑफ अॅग्रिकल्चरमधून बीएससी अॅग्रिकल्चरची पदवी घेतली. (UPSC result)
यानंतर तिने पुणे येथे राहून स्पर्धा परीक्षेची तयारी सुरू केली. सलग चार वर्षे यूपीएससीच्या अभ्यासात झोकून देत असताना तिला तीन वेळा अपयशाचा सामना करावा लागला. मात्र त्या अपयशाने खचून न जाता जिद्द, चिकाटी आणि सातत्य यांच्या जोरावर चौथ्या प्रयत्नात तिने अखेर यश मिळवत देशात ९१३ वा क्रमांक पटकावला.
