जालना : सेवली सर्कल अंतर्गत येणाऱ्या प्रधानमंत्री आवास योजना व रमाई आवास योजनेतील घरकुलांचे रखडलेले हप्ते आणि अपूर्ण कामांचा प्रश्न अखेर मार्गी लागला आहे. वंचित बहुजन आघाडीच्या सातत्यपूर्ण पाठपुराव्यामुळे प्रशासनाने या सर्कलसाठी स्वतंत्र ग्रामीण गृहनिर्माण अभियंत्याची नियुक्ती केली आहे.
सेवली सर्कलमधील शेकडो लाभार्थ्यांची घरकुलांची कामे अंतिम टप्प्यात असताना, काही लाभार्थ्यांना पुढील हप्ते मिळणे बाकी होते. मात्र, तांत्रिक मूल्यमापन व प्रगती अहवालासाठी आवश्यक असलेला ग्रामीण गृहनिर्माण अभियंता उपलब्ध नसल्याने हप्ते वितरणात मोठा विलंब होत होता. परिणामी अनेकांची घरकुलांची कामे ठप्प झाली होती. (Housing Schemes)
या पार्श्वभूमीवर वंचित बहुजन आघाडीचे मराठवाडा उपाध्यक्ष दिपक डाके यांनी ४ मार्च २०२६ रोजी पंचायत समिती, जालना येथे लेखी अर्ज देत अभियंता नियुक्त करण्याची मागणी केली होती. त्यांच्या या मागणीची दखल घेत गटविकास अधिकारी (BDO) यांनी दि. १६ मार्च २०२६ पासून श्री. हसीब मुजीब खाजा यांची सेवली सर्कलसाठी ग्रामीण गृहनिर्माण अभियंता म्हणून नियुक्ती केली.
या नियुक्तीमुळे आता प्रधानमंत्री आवास योजना आणि रमाई आवास योजनेतील लाभार्थ्यांच्या कामांना गती मिळणार असून, प्रलंबित हप्ते लवकरच त्यांच्या बँक खात्यात जमा होण्याचा मार्ग मोकळा झाला आहे. प्रशासनाच्या या निर्णयामुळे ग्रामीण भागातील लाभार्थ्यांनी समाधान व्यक्त केले आहे.
