मुंबई : वंचित बहुजन आघाडीच्या मुंबई प्रदेश कमिटीने नुकताच पक्ष प्रवेश कार्यक्रम घेतला. दादरच्या आंबेडकर भवन येथे हा कार्यक्रम घेण्यात आला. महाराष्ट्र प्रदेशाध्यक्षा रेखाताई ठाकूर प्रमुख मार्गदर्शक म्हणून उपस्थित होत्या.
यावेळी काँग्रेस, राष्ट्रवादी काँग्रेस व आजाद समाज पार्टीचे अनेक पदाधिकारी त्यांच्या शेकडो कार्यकर्त्यांसह वंचित बहुजन आघाडीत सामील झाले. प्रस्थापित पक्षांकडून न्याय मिळत नसल्याची भावना येणाऱ्या पदाधिकारी कार्यकर्त्यांची होती.
आंबेडकरी जनतेची दिशाभूल करण्यासाठी काही चेहरे उभे केले जातात. पैसेवाले पक्षच त्यांची प्रतिमा तयार करत असतात. त्याला काही लोक बळी पडतात. परंतु तिथे गेल्यानंतर त्यांचा भ्रमनिरास होतो आणी ते शेवटी वंचित बहुजन आघाडीतच येतात, असे रेखाताई ठाकूर त्यांच्या मार्गदर्शनादरम्यान म्हणाल्या.
