Byju Raveendran Case : एकेकाळी भारतातील एडटेक क्षेत्रात आघाडीवर असलेल्या ‘बायजूस’ कंपनीचे संस्थापक बायजू रवींद्रन यांच्याविरोधात सिंगापूरमधून मोठी कायदेशीर कारवाई झाली आहे. सिंगापूर न्यायालयाने न्यायालयाचा अवमान केल्याप्रकरणी रवींद्रन यांना सहा महिन्यांच्या कारावासाची शिक्षा सुनावली असून, त्यांना मोठा आर्थिक दंडही ठोठावण्यात आला आहे.
ब्लूमबर्गच्या अहवालानुसार, न्यायालयाने रवींद्रन यांनी मालमत्तेशी संबंधित अनेक आदेशांचे पालन न केल्याचे स्पष्ट केले आहे. एप्रिल २०२४ पासून त्यांनी न्यायालयीन निर्देशांकडे दुर्लक्ष केल्याचे निरीक्षण नोंदवण्यात आले. यामुळे न्यायालयाने कठोर भूमिका घेत त्यांना संबंधित अधिकाऱ्यांसमोर हजर होण्याचे आदेश दिले आहेत.
Also Read : क्रीडा क्षेत्राला मोठा धक्का! आशियाई स्पर्धेत सुवर्ण जिंकणारे पहिले भारतीय नेमबाज रणधीर सिंग यांचे निधन
यासोबतच न्यायालयाने त्यांना ९० हजार सिंगापूर डॉलर्स म्हणजेच सुमारे ७०,५०० अमेरिकन डॉलर्स इतका खर्च भरण्याचे निर्देश दिले आहेत. तसेच ‘Beeaar Investco Pte’ या कंपनीवरील आपली कायदेशीर मालकी सिद्ध करणारी कागदपत्रे सादर करण्यासही सांगितले आहे. संबंधित कंपनीकडे दुसऱ्या एका संस्थेतील समभाग असल्याचे समोर आले आहे. हे प्रकरण कतार इन्व्हेस्टमेंट अथॉरिटीच्या उपकंपनीने दाखल केलेल्या अवमान याचिकेमुळे उभे राहिले. या निधी संस्थेने बायजूसमध्ये गुंतवणूक केली होती. त्या काळात कंपनी आर्थिक अडचणीत सापडली होती आणि मोठ्या प्रमाणावर नोकरकपात सुरू होती.
Also Read : बोईसर ग्रामपंचायतीच्या ‘त्या’ कारवाईविरोधात बेमुदत धरणे आंदोलन; १५ दिवस उलटूनही प्रशासन सुस्त!
दरम्यान, बायजूसच्या आर्थिक घसरणीनंतर बायजू रवींद्रन यांच्याविरोधातील कायदेशीर संकट अधिक गडद होताना दिसत आहे. अमेरिकेसह अनेक देशांतील गुंतवणूकदार आणि कर्जदाते त्यांच्या विरोधात न्यायालयीन लढाई लढत आहेत. विशेषतः अमेरिकेत १.२ अब्ज डॉलर्सच्या कर्जप्रकरणामुळे कर्जदाते नुकसानभरपाईसाठी प्रयत्न करत आहेत.
